Dem hochwirdigen fursten unnd hern hern Johansen bischove zu Culmenn etc. meinem gnädigen herrn

Ewer Furstlichen Gnaden schreiben datumb Lobaw den 29ten tag Decembris ist mir dise tag zukhomen, darin Ewer Furstliche Gnade begern vernomen, / und darauf Anthonien Fugger anngeredt, / der erbeut sich solch in Ewer Furstlichen Gnaden schreiben angetzaigt gelt, / namblich alhie 10 florentiner rheinisch Iheronimus Saylern zuhörig, unnd dan die 62 ducaten Albrechten Cuon in Hispanien von Ewer Furstlichen Gnaden wegen zubezalen verschaffen wolle. / Dagegen wirt ime, dem Fugger, hie umb die 10 florentiner gegem emphang derselben ain offen brieflin an Ewer Furstliche Gnade, dergleichen von Albrechten Cuon in Hispanien meins versehens auchgegeben. / Das hab Ewer Furstlichen Gnaden ich auf derselben schreiben nit woln verhalten, dann der underthanigklichzugedienen bin ich alczeit willig. /

Datumb Augspurg, den 26ten tag Februarii anno etc. im XXXIII-n.

Ewer Furstlichen Gnaden

unnderthäniger

Barthlome Wellser der olter burger zu Augspurg

Dem hochwirdigen fursten unnd herren, herren Johann Bischove zu Culmansee etc. unnserm gnedigen herren

Craca

Bartolme Welzer, 4 octobris 1533

Hochwirdiger furst, Genediger herr. Ewrn Furstlichen Gnaden sein unnser unnderthänig willig dienst allezeit zuvor. /

Ewrn Furstlichen Ganden fuegen wir unnderthänigklichen zuvernemen, / das die unnsern zu Annttorff unns verganngen tag geschriben unnd angezaigt haben, / wie das inen etlich wein von Sannd Martin zue komen seien, / Ewrn Furstlichen Gnaden zuehörig. / Wolten sÿ geren wissen, / wahin sÿ solhen wein schickhen sollen. / Deshalber wellen Ewer Furstliche Gnaden den unnsern gen Annttorf / oder unns alher antzaigen lassen, / wohin sÿ solhen wein schickhen, / so soll demselbigen / unnderthänigklichen volg beshehen, / dann Ewrn Furstlichen Gnaden unnderthanigklichen zugediennen / sein wir allezeit willig. /

Dattum Augspurg den XVII-den tag Iulii anno etc. im XXXIII-ten.

Ewrn Furstlichen Gnaden

unnderthänige

Barthlome Welser unnd geselshafft

Unsernn freuntlichnn grues / und was wir vil freuntlichs wolgefallens vormugen zuvorann. / Erbar und fester her, gunstiger freundt. /

Vor etlichen monetenn hab wir ein briff von euch gehabt, / dar innen ir uns anczeigt, / wie etliche heut mit vin de sant Martin durch ewermm diner Albrecht Kuoen gen Antorff an Francz Werner sey geschickt, / des zu schreibens wir euch fruntlich danckenn. / Haben ouch gedochtmm Franczen lossen wissen, wie er sich mit dem wein sol haltnn etc. Hie schicke wir euch dis puntel mit briven ann ewer tochtermann senor Hieronimo Seler, unsernn sundren vortrautenn freundt in Hispanienn, / und in abwesenn ann ewrmm diner Albrecht Kuon zu sendenn. / Bittnn derhalbenn, / wolt vorschaffen, das dem so gesche. / Sol ouch was daruff ghen, / leth uns anschreibnn. / Wollenn uns gen euch und die ewer recht haltnn. / Und wor wir euch doneben ouch imants vonn ewernn wegen werden wissen vil furdrung und freuntschafft thun, / wolle wir alweg willig gefunden werden. / Hiemit thu wir euch in langweriger gesuntheit und aller gluckseligheit / Gote dem almechtigen befhelenn. /

Datum uff unsermm slosse Lobau, XI Ianuarii 1534.