Ferdinandus divina favente clementia Romanorum rex semper augustus ac Germaniae, Hungariae, Bohemiae etc. rex, infans Hyspaniarum, archidux Austriae, dux Burgundiae etc., marchio Moraviae etc., comes Tirolis, universis et singulis principibus tam ecclesiasticis quam saecularibus, archiepiscopis, episcopis, ducibus, marchionibus, comitibus, baronibus, militibus, nobilibus et ignobilibus, ac civitatum, terrarum, oppidorum et locorum aliorumque ac exercituum capitaneis, gubernatoribus, rectoribus, potestatibus, magistris civium, iudicibus, consulibus, officialibus, castellanis et locatenentibus, eorundem passuum et limitum custodibus, d[ic]tarum tabellarum ac viatici exactoribus et collectoribus, necnon omnibus et singulis cuiuscumque fuerunt status, gradus, ordinis, condicionis et praeeminentiae, ad quos hae nostrae litterae pervenerint, amicis et benevolis nostris salutem et benevolentiae nostrae affectum, subditis vero nostris gratiam nostram regiam et omne bonum.

Cum reverendus pater, dominus Iohannes Dantiscus, episcopus Culmensis, apud sacram caesaream et catholicam maiestatem, dominum et fratrem nostrum carissimum, serenissimi regis Poloniae etc., fratris et sororii nostri carissimi, orator, intendat ad Regnum Poloniae dictumque regem, dominum suum, modo redire, cui cum nos ubique tutum et securum iter redeundi esse desideremus, idcirco vos omnes et singulos praefatos amicos et benevolos nostros affectuose hortamur, praedictis vero subditis nostris districte praecipiendo mandamus, quatenus intuitu nostri eundem episcopum oratorem et omnibus suis famulis et comitiva, equis, sarcinis, bulgis et rebus quibusvis, quos et quas pro necessitate et utilitate sua et suorum famulorum ac comitivae secum duxerit, per omnes et singulos passus, districtus, limites, pontes et loca, ad quos et quae illum et dictos suos famulos et comitivam cum eo declinare contigerit, sine alicuius datiae, gabellae, viatici exactione et solutione atque aliqua molestia et impedimento ad praefatum Regnum et regem Poloniae libere et secure redire, ire, transire atque in eisdem stare et morari et, quando eis libuerit, recedere, permittere illisque vitae necessaria pro competenti et honesto praetio ministrare velitis, in quo antedicti vos amici et benevoli nostri nobis rem gratissimam efficietis, vos vero subditi expressam nostram exsequemini voluntatem.

Datum in civitate nostra imperiali Ratispona, die ultima mensis Junii anno a nativitate Domini MDXXXII, regnorum nostrorum Romani secundo, aliorum vero sexto.

Ferdinandus

Ad mandatum domini regis proprium