Sumus cum Paternitate Vestra una plurimum molesti, quia tot laboribus crebriusque conventibus Prussiacis secutum fuerit nihil, quemadmodum et Vestra Paternitas scribit, et Ioannes Flaxbinder narrat. Narravit autem omnia tamquam ab initio conventionum gesta, unde nos quoque eiusdem sententiae sumus cum Vestra Paternitate, quod tandem, cum in vulgi manu videatur summam rerum esse, quod varium semper fit(!), necesse erit per vos ipsos agere haec, quae poterint ordine constitui aeque bono, absentibus nobis.

..............

Cussionem nummorum, quorum octo Flaxbinder praesentavit, probamus et ratam habemus, et licet Poloniae terrae fortasse non probabunt, praesertim cum censeretur consultius factum, si novem pro mediente constituti essent sicut in Regno, tamen quia fortasse ad introducendum medientes meliores nummi constituuntur, idcirco deferimus Paternitati Vestrae eam hortantes, sic eam nummorum cussionem fieri mandet, ut et receptibiles essent, et publicitus non incommodarent. Pro solidis non cudendis et pro violentiis Vestrae Paternitati illatis agemus cum Gedanensibus per nuntium ad conventionem Prussiae venturum.

Datum Vilnae, feria III post festum Sancti Martini proxima MDVIII.