Dem durchlauchten, hochgebornen fursten und herren, hern Albrechten, von Gots gnaden marggraff zu Brandenburg, / in Preussen, / zu Stetin, / Pommern, / der Cassuben und Wenden hertzog, / burggraff zu Normberg und furst zu Rugen, / unserm hochgunstigen, lieben herren und freunde

Durchlauchter, hochgeborner furst, hochgunstiger lieber her und freundt. / Unsere freuntliche und vleiswillige dienste zuvoran. /

Es hat uns Ewer Furstlichen Durchlaucht schreiben / der achtbar, wolgelert magister Johan Lomoller, unser alter, lieberr bekanter, uberantwort, / den wir in Ewer Furstlichen Durchlaucht nahmen / bei uns gerne gesehen / und gehort / in sachen, / der sich Ewer Furstlichen Durchlaucht underthan Jorg Lautenschleger von wegen seins weibs mut[t]er, / die er auch zu sich gezogen, / hat angenommen, / die welche mit andern iren vorwanten und vormundern / widder die ersamen unser lieben getreuen burgermeister und rathman unser stadt Braunsberg sich mit schmelichen bezichtigungen, / die ire ehren und gutt glimpff nicht wenig vorletzt, / eingelassen, / in zugemessen / under vil andern schmitzigen worten, / wie die acta auch klerlich mitbrengen, / das sye zweierlei abschrifft aus des rats buchern gegeben, / doraus merglicher argwohn gespurt etc., dobei auch in sonderheit dem ersamen, unserm lieben getrewen Thewes Schissenteuber, / in gemelter unser stadt burgermeister, / zugelegt, / das er falsche vorsiglung zuwegen gebracht, / solche und vil ander unehrliche wort in die acta gesetzt, / auch uns haben lassen anhoren, / woruff unser underthan der burgermeister und rath sich vor uns uff gedachte vormunder unnd principall beclagt, / derwegen recht und urteill gebeten, / das wir in nicht abgeschlagen und solchen rechtstag uff unser negste in unser stad Braunsberg zukunft / vorlegt. / Hieraus hat in hochem furstlichem vorstande Ewer Furstliche Durchlaucht zubedencken, / weil diese sache so weit geflossen, / wie von Lautenschlagers und der andern wegen, / dorinne sunlich an irkeins teÿls ehre vorletzung / muge gehandelt werden. / Wil er, der Lautenschleger, mit den andern vormunden uff seine principall legen, / das die in solche bezichtigung zuthun bevolhen, / als dan / ist unnott, das er mit den andern dovor antworten. / Was aber die sache in sich selbst angehet, / doraus die zicht gescheen, / ist an uns durch eine freie appellacion gedachts Lautenschlagers und der ander vormunderr gezogen und gekommen, / auch rechtlich von uns dorinnen erkant und geortert worden, / wie dan magister Johan Lomuller Ewer Furstliche Durchlaucht weiter wirt berichten, / in der gunst wir uns bevelhen / und derselben Ewer Furstlichen Durchlaucht leibs und seele volkommene langwerige gesuntheit in glugseligem regiment von Gotte dem almechtigen bitten.

Datum Heilsberg, den XIIII Martii MCXLI.

Ioannes, von Gots gnadenn bischoff zu Ermelandt. /

Ioannes episcopus Varmiensis manu propria subscripsit