Fabiano Czem.

Unsernn etc.

Das wir so lengsam diesenn unsernn bothenn noch unserm heimkomen von der tagfart / abgefertigt, / hat uns zum teil die mudickeit, so wir von dem wisenn , welches uns nu swer wirdt, / bokomen, / zum teil auch das wir newlich einen bothen an der alten koninglichen majestet hof, / da wir den viel hin geschriben, geschicket haben, / gehindert. / Nu aber haben wir fleisig an die junge koningliche majestet und andere hernn von wegen dieses landes anliegenn geschribenn, / in welchenn wir uns den fast und viel auf Ewre Herlichkeit person und derer mit gegeben aus negster tagfarth geworben und muntliches anbringenn thun referirenn, / wie wir auch nicht czweifeln, / das Ewer Herlichkeit solchs aufs beste und fleisigste koningliche majestet werden vorgetragenn habenn. / Bitten derwegenn freuntlich, / was Ewer Herlichkeit darauf vor antwurt bekomen, / uns bei diesem bothen wissen zu lassenn. / Wir haben auch dem hern hofmeister und secretario von dem gewande, / so durch Ewer Herlichkeit ihnen [i]m namen der hern redte zugestellet solte werdenn, / wie ess den in der tagfart vorlassenn, / anzeiung gethann, / als solten sie das schon bekomen habenn. / Wie ess darum ist, wollet uns auch nicht vorhaltenn. / Von zeitung haben wir itz hie nichts newers, / den was alhie vor Ewer Herlichkeit vorwissenn gewesen ist, / davon auch koningliche majestet wie Ewer Herlichkeit wisssentlich, ist geschriben wordenn. / Wo alda etzwas gewisses sein wirdt, / bittenn wir uns solches mitzuteilenn. / Bovelenn Ewer Herlichkeit dem almechtigenn Got mit langweriger gesuntheit. /

Datum 30 Maii XLVII.

Unsernn etc.

Das ihr unser negstes schreibenn boantwurt habet / und darnebenn ewrenn zustandt angeczeigt, / ist uns angenem gewesenn, / und habenn solches gerne erfharenn. / Wo wir auch darin euch viel furderung zu ewer besserung kundtenn erzeigenn, / seindt wir das czuthun genigt. / Vor die czugeschribenen czeitungen / bodanckenn wir uns freuntlich, / bei uns ist dasmol nichts, / das nicht albereit bei euch erschollen were. / Wo ihr aber etzwas gewisses alda erfharenn werdet, / bitten wir, / uns das mit zuteilenn nicht nach zu lossenn und die zuvorsicht ...u uns zu haben, wo wir der ... und den ihren / viel freuntlickeit wusten zu erzeigenn, / das wir darzu alwege willig sein. Gotlichen genaden bevolen.

Datum aus unserm schlosse Heilsberg, den 30 Maii 1547.