Meinem bruder Bernt /

Unsernn etc.

Dein schreiben hab wir gerne gelesenn, / und ist uns gefall[en], das du uns weitlofftig host bericht. / Des, was du von uns in befhel host gehabt, / eins ist ausbliben, / wie es mit dem brive de[s] erczbischoffs zu Vpsal von Rom, / der an hern Jorgen in abwe[sen] des von Werden lautet, / zugangen, / ob in herr Jorg gelesenn, / und was vor ein meynung dar in gewesenn, / solchs zu vorschenn hab noch fleis. / Den von Werden magstu anreden / und vonn unsernn wegen grussen, / mit anczeigung, / ob er dem von Vpsal w[ie]der wold antwurten, / das wir sein schreiben neben unsermm gennn Rhom zu fertigen uns erbitten / unnd uffmerken, wie er sich wir[d] stellenn etc. Du wirst ouch hern Jorgen uffs fleisigst von unseren wegen grussen / und sagen, / das so vil dancksagung unnotig / wei[l] wir i[n dem, / da]s im zu nucz und ehren gereichen mag, / nich[t] allein willig, / sonder uns ouch schuldig erkennenn, / und das er / wo... wirt thun, / so er mit den ersten der konigin und dmn hern zu Ploczke schreib... do bey der canczley nicht vorgesse. / Ouch wirstu uns entschuldig[en], das wir im nicht geschriben, / bittend das er an dir, / wie einemm [le]bendigen brive, / genugen wold haben. / Weil er ouch an henden noc[h] swach ist, / wolte wir nicht gernn, das unsere brive von andre[n] gelesen wurden. / Es wirt uns aber ein herczliche freud seinn, wan wir sein eigen hantschreiben widerummb werden sehenn etc. Got gebe im korczen etc. Hab gut achtung, was von Werden der grosse hochmut, / den wir bey dissen zceichen grosmechtige hern pflegen zuvorsthen gebenn, / wirt vorhabenn, / und was er vor newe practiken , ane die er nicht sein kan, / wirt anstellen etc. Bey unsermm M... und ohem Valentein schreib und entpeut weitlofftig, / was sich allenth[alben] wirt zutragen, / und das er zu frwer zceit uff negsten montag oder den sontag zuvor bey uns sey, / dan wir dieselbte zceit an koniglichen hoff schicken, / es wurd sich wol treffen, / das wir her Jorgens brive mit theten ubersenden etc. Du wirst unsere libe svegerin beide / und alle gutte freunde grussen. / Gotlichen gnaden befolen.

Datum aus unserm schlosse Heilsberg, den X Iunii M D XLV.