Rreverendissimo in Christo Patri et Domino, domino Iohanni Dei gratia episcopo Culmensi ac Pomesaniensis ecclesiae ad[mi]istratori domino meo [] observandissimo

Reverendissime in Christo pater et domine, domine mi clementissime. Me totum Reverendissimae Dominationi Vestrae commendo et offero.

Quando Reverendissima Dominatio Vestra me suae ecclesiae canonicum commode sustinere non potest et cum venerabili domino Caspari Lysseman, cui licet omnia, quae metipse voluisset, concessissem, nihil tamen confectum est, praeterea Reverendissima Dominatio Vestra praesentium redditorem venerabilem dominum Vincentium Kerger mihi etiam dudum et ferme ab infantia et cognitum et virtute probatum, ad me in ipso negotio dimisit, accedunt etiam magnorum virorum et dominorum amicorum meorum ac confratrum ecclesiae Reverendissimae Dominationis Vestrae in favorem dicti venerabilis domini Vincentii commendationes. Quare Reverendissimae Dominationi Vestrae ipsum Vincentium unice et quam diligentissime commendo atque in locum meum in canonicatu et praebenda ecclesiae Reverendissimae Dominationis Vestrae cum omnibus attinentiis resigno. Quem Reverendissima Dominatio Vestra pro solita pietate gratiose suscipere meque inter servos suos tamen perpetue conservare dignetur, obsecro.

Nova digna Reverendissimae Dominationis Vestrae nulla habeo. Recepi litteras ex urbe de data XV Octobris, quibus perscribitur mihi pontificem Nicenum concessisse cum maiore poenitentiaria ac cancellaria idque cum magna indignatione omnium et nisi brevi reversus fuerit, alium pontificem electurum aiunt refertque harum redditor dominus Gotschalcus Tymmerman, cum Venetiis esset, rumorem illic venisse ducem Urbini Romam intercepisse, quod tamen non certe affirmare vult.

Alia non sunt, nisi me Reverendissimae Dominationi Vestrae iterum commendo et dedo.

Ex Gdani(!), die VI Decembris anno MDXXXIII.

Reverendissimae Dominationis Vestrae Leonardus Niderhof servitor