Ouch hab wir uff Ewer Herlichkeit vorschrifft von Preuschenmarckte an uns gethon Wolffen Bolczen vonn Thorn schrifftlich befhel an unsere amptleute zum Altenhause geben, / das sie mit den greniczen und gebrauch des waldes, / do zu er vormeint, recht zu haben, / biss zu unser zu kunfft / stille halten sollen, / nicht wissende, das gedochter Bolcz dasselbige mol korcz zuvor unsernn leuten hot beyl und axen genomenn, / welche er noch uff borgschafft noch uff ander amptleuth unser anlangen hot wolt ausgeben und biss zu disser zceit frevelich bey sich vorhelt, / dem wir wol wusten noch zu komen, / so wir Ewer Herlichkeit fruntschafft nicht hocher wugen. / Derwegen wir solchs Ewer Herlichkeit nicht haben wolt vorhalten, / do mit gedochter Bolcz do hin gewisenn wurd, / das nicht ander befhel vonnotenn etc.