Unsern freuntlichnn grues mit wunschung aller seligheit zuvoann. / Grosmechtign, edlen, volgebornn hern, / gunstige, gutte freunde. /

Dissen tag hab wir Ewer Herlichkeit briff mit dem edlen, ernfesten hern Johan von Werden, houptman zur Newenburg etc., entfangen und vorlesenn. / So es dan nicht wil anders sein, hab wir uns Gote uff dissen weg ergeben. / Sein gotlicher wille gesche. / An uns, / so vil in unsermm vormugen ist, / sol nichts abghen, / das wir dissem unserm vaterland zu ehren unnd nucz umer werden wissen zu thun und nebenn andrenn hern aus zurichtnn. / Schriffte / und brive, die zu unser vorhandlung nottorfftig sein, / hab wir noch Ewer Herlichkeit rothe mitgenomenn, / do mit boser leut unczimlich vornemenn zu sturczen, / unnd wollen uns morgen von hynnenn mit Gots hulff uff den weg machenn. / Ewer Herlichkeit in sein gotliche gnad befhelend.

Datum Thornn den XXVI Novembris M D XXXVI.