» Korpus Tekstów i Korespondencji Jana Dantyszka
Copyright © Pracownia Edytorstwa Źródeł i Humanistyki Cyfrowej AL UW

Wszelkie prawa zastrzeżone. Zabrania się kopiowania, redystrybucji, publikowania, rozpowszechniania, udostępniania czy wykorzystywania w inny sposób całości lub części danych zawartych na stronie Pracowni bez pisemnej zgody właściciela praw.

List #3157

Gdańsk Town Council do Ioannes DANTISCUS
Gdańsk (Danzig), 1540-03-17
            odebrano Guttstadt (Dobre Miasto), 1540-03-21

Rękopiśmienne podstawy źródłowe:
1czystopis język: niemiecki, AAWO, AB, D. 96, k. 12-13
2kopia kancelaryjna język: niemiecki, APG, 300, 27, 16, k. 216r-217r

Pomocnicze podstawy źródłowe:
1regest język: polski, XX w., B. PAU-PAN, 8249 (TK 11), k. 194

 

Tekst + aparat krytyczny + komentarzZwykły tekstTekst + komentarzTekst + aparat krytyczny

 

Dem Hochwirgigenn inn Gott Herre, herrenn Johann vonn Gotts gen[a]denn des loblichenn stiffts zcu Ermelanndt bisschove, unnserm genedigenn herrenn.

Hochwirdiger inn Got / Genediger Herr. /

Unser bereidtwillige unnd unvordrossene diennste seint Euer Hochwirdige Gnade allewege zcuvoran entpholen.

Genediger Herre. /

Wier haben in diesen tagen von unserm secretario magistro Thoma Schauenengell (zo wier noch zcur zceit an koniglichem hoffe haben) unnd sunst diese unvorhoffte kundtschafft uberkommen. Als wie die konigliche mayestet unnser allergenedigster herre / berichtet, / das wier die ausfure alhie vorbotten / unnd unsern port bÿss auff Johannis negstkunfftigk geschlossen haben sulten.

Whoraus dan ihre mayestet villeichte / auff ihrer hochwirdigen rethe der Cron / anregent / geursacht seÿ / ganncz hartte unnd ernste mandate, derwegen an Euer Hochwirdige Gnade unnd die andern herren dieser lannde rethe samptlich / ergehen zcu lossen, / mit uns derwegen zcu reden unnd von sulcherm furhaben abczuhalten, ader wie das sunst solche ader dergleichen form haben mogen etc. Das uns je so vill deste mehr beschwerlich sein mus als wier des nÿe gedacht / vil weÿniger in der taedt angestelt ader begundt haben. /

Wie das auch Euer Hochwirdige Gnade (unsers erachtens) unvorborgen / czu was meÿnunge aber / der gestrenge unnd erentfeste her Johan von Werden / unnser vielgeliebter burgermeister unnd burggrabe / auffer Neuburgk unnd Preuschmark hauptman etc., derwegen mit Euer Hochwirdige Gnade jungster tage geredt unnd in was bedenncken wir des ... fals / in anmerckunge der hewtigen zceite ... unnd ummbeligender lannde gelegenheit [an]stehen / unnd nicht ungerathen achten theten ... .

Dorczu auch dasselbige beÿ Euer Hochwirdige Gnade dur[ch] unnsern secretarium den erhafftigen ... magistrum Georgium Donner / nachme... haben ernewern lassen, / das hat Euer Hochwirdige Gnade ... ane czweiffell in guttem geden[ck] enthalten unnd haben gutter la...terer dienstlicher zcuvorlessiger meinun[g] nicht underlassen konnen. Dasselbige Euer Hochwirdige Gnade vormittelst diesen schrifften anczuczeigenn.

Dan wier ungerne wol... uns dergestalt / eigenes radts / ane weiter unnd breiter bedencken jegen ein gemei[n] lanndt unnd obligen vorgreiffen unn[d] aber solchs alles in seiner wirde unn[d] / ungegrunten maiss lossen / und uns d... worhafftigen unschult dorinne wier (wil[l] Gott) wollen befunden werden / frewen n...sten. /

Wie dem allen d... mit dennoch die hochgenante konigliche mayestet dieses thuens notturfftigk bericht entpha[ngen], dorczu wir auch des whanes ader molest... ab villeichte ihre mayestet der ichten widd[er] unns begriffen / hette / gefreÿet werden muchten. Szo ist an Euer Hochwirdige Gnade unnser fleissigk unnd dienstlich bitt, sie wolle geruchen ihrer konigliche mayestet uns dess fals worhafftige unschult im besten zcuermelden. Szo als wir auch zcu erster zceit dergleichen zcu thuende nicht nochlossen wollen unnd whe Euer Hochwirdige Gnade (ganczer trostlichenn hoffnunge) deine, also nochczuseczen gesÿnnet seÿn wurde. Szo muchte Euer Hochwirdige Gnade solche schritffte an uns mit den ersten gelangen lossen, / die wir ungeseumet an die konigliche mayestett durch unsern eigenen botten (dievill wir doch der unnd anderer sachen halben an ihre konigliche mayestet werden schicken mussen) vortstellen und Euer Hochwirdige Gnade der muher unnd unkost erheben wolten.

Dasselbige umbe Euer Hochwirdige Gnade ihm grosseren zcuvordienen wollen wier stecz [u]nvordrossen befunden werden mit der hulffe Gotts der Euer Hochwirdige Gnade lannge gessundt unnd sseligelich fristen unnd enthaltenn wolle.

Datum Dannczigk, mithwochs, den 17 Martii anno etc. 40.

Euer Hochwirdige Gnade diennstwillige burgermeister und radtmanne der stadt Danczigk

Postscript:

Und begeren hirauff Euer Gnade gnedig schriftlich andtwort mit denn erstenn.