Wie wir negst im unsermm schreibenn Ewer Herrlichkeit angezceigt, / das wir uff die wichtige hendel / mit Dennemarken und uff den vorgenomenn zcog noch ⌊Antorff⌋, / darmol in der eil nicht habnn mugen antwortenn, befinde wir noch, / das es die not erfordert / nicht durc[h] schriffte, / sonder muntlich uns der und anderer sachenn halbenn mit Ewer Herrlichkeit zu beredenn, / das fueglich, / wie wir uns vorsehen, / im korczen sich mag zutragen. Es ist ouch noch nicht kleine zceit vorhanden, bisz uff denn ersten tag Novembris, / an unserm vleis und freunttlicher zunhegung. / Worinne wir Ewer Herrlichkeit zu nucz und ehrenn vil guts mugen ausrichtenn, / sol nichts abghenn. Des mag sich Ewer Herrlichkeit zu uns genczlich vorsehenn, / wie dan ouch dieselbte von dissem unsermm geliebtnn bruder ⌊Jorgenn⌋ / weitlofftigerr wirt vorsthenn. / Hiemit wir Ewer Herlichkeit mit al den irenn gotlichen gnaden befhelen.
