Hern Kostken

Unsernn etc.

Uns ist gestrigs tags Ewer Herlichkeit schreiben / neben koniglicher commissionn und andren briven, / die wir hie bey widerschicken, / geworden, / aus welchen wir Ewer Herlichkeit wolbedochte meynung / wol haben eingenomenn. / Woruff wir die citation (/ weil sich / ausgeslagen den vortrag / die Lismannynn zu[m] rechte czeut /) noch laut koniglicher commission haben lossenn schreiben, die wirt Ewer Herlichkeit den anderen hern commissarien zu besiglenn, / und weiter / wol wissen zu bestellenn. / Wie Ewer Herlichkeit der zceit gedencke uff unserr lieben frawenn geburt feir zu legen, / beduncket uns, / von wegen der mosterung, die bald darnoch sol gehalden werden, / unbekuen, / vorsehenn uns, / die stelle und tag in der citacion geseczt / Ewer Herlichkeit nicht werd ungelegen sein. Was den gebott briff anghet, / achten wirs, / ane sverheit wirt sein zuvorlegen, / nicht allein des sigels halben, / das alle wir[d] seinenn nhamen sold mit brinngen, / und nicht worte haben, die darzu nicht gehorenn, / sonder ouch, / das die zceuge vordochtlich sein, / die ... werden angeczeigt, obs pawrenn oder burger sein, / ouch nicht melden, in welchem ort oder stat vater und mu[t]ter vortrawt / ire kinder geboren und erczogen haben.

Die vorschreibung imm statbuch zu Thornn, / nemlich die ane beyw[e]sen und vorwillung Hans Muckers geschen, hot nicht stelle, / wen... ouch mit demm artikel des colmischn rechts, / den wir negst Ewer Herlichkeit zu geschickt, / getilget. / Was die wilker zu Thornn helt, / mu[ss] vor den commissarienn bewisenn werden. / So vil wirs vorsehenn, halt wirs do vor, / das gemelte vorschreibung / und abrichtung der bruder, / der unelichen geburt nicht klein geczeugnis geben ...ne / und andrenn, / das koniglicher sachen zu gut mag komenn, unser pflicht noch wolt... nicht nochlessig gefunden werden etc. /

Die rede mit hern Zce[men] ist uns gefallen. / Wir wollenn uns darnoch wissenn zu h[alten]. Vor korczen tagen hab wir ein briff von im entfangen, / ... uns zu wissen tag und stelle der commission, / daruff wir g..., Ewer / Herlichkeit wold unserr beygelegt schreibenn in zulossen komenn, ... die sache vorgenomenn sol werden, / weil Lucas Helm mit k... thut rumenn / und koniglicher freiheit gebraucht, / sold er ouch pre... sein. / Ist ouch nottig, das imant des nhamenns wider die ...nym disse sache den commissarienn vor brenge, / welchs Ewer [Herlichkeit] wirt wissen zu treffenn, / die wir in aller seligheit gotlichen gnaden befelenn. /

Datum aus unserm schlosse Heilsberg, den ersten tag Augusti MD XLV.

Inn dem brive an hern Zcemenn hab wir uns der zceit unnd stelle halben / uff die citacion geczogen.