Ioanni a Werdenn

Unsernn {etc.} Edler errnvhester her besunder lieber freunt.

Ewer Herlichkeit an uns gethanes eigen hant schreiben / vor ihrem abscheidt zam koninglichenn bogrebnus habenn wir den 22 dits mo... erhaltenn und dessulben meinung genugsam eingenomen. / Bodancken uns freuntlich kegen Ewer Herlichkeit des ferneren erbittens / so die vnserer swegerin halben der fraw Scheuekin / unsers bruders Georgen / und Hans Keting die wir Ewer Herlichkeit in vnserem nehesten schreiben freuntlich zufurderen bouolen / thut anzeigenn. Sein auch herwidder des genigten gemuts / kegen Ewer Herlichkeit und dersulbenn vorwanten / wie den solchs Ewer Herlichkeit alwege gespuret / das wir ihr bestes zuwissen und die zufurderen nicht wollen nachlassenn. Welchs wir den auch gerne vor dismol in angezeigter sachen czwuschen Ewer Herlichkeit freuntschaft / und vnserem swegerlichen vorwantenn freunden seligen Wachsslagerin erbnamen / vorgestellet hettenn / weil wir aber nicht grundtlich der sachen gelegenheit gewust [v]ns auch diesulbe [v]nser freuntschaft dar...icht borichtet haben wir in dem Ewer Herlichkeit nicht kunnen wilferig werden. / Wo man uns aber hernaher genugsam woran ess mangelt / und worin gedochte erbnamen zuvnderrichten seindt / wirdt anzeigen, / alsdan wollen wir uns dergestalt kegen Ewer Herlichkeit und ihr freuntschaft erzeigenn / und die erbnamen so viel an uns ist dahin weisen / damit keinem zu noch gangen / sunder unsers vorhoffens die sache ane fernere weiterung und vorzug sunlich vortragenn werde. Das sich Ewer Herlichkeit / die wir gotlichen genaden bouelenn / gewisse zun uns vorshen sollen.

Datum aus unserm schloss Heilsberg den letzsten Iulii M D XLVIII