» CORPUS of Ioannes Dantiscus' Texts & Correspondence
Copyright © Laboratory for Source Editing and Digital Humanities AL UW

All Rights Reserved. No part of this publication may be reproduced or transmitted in any form or by any means, electronic or mechanical, including photocopy, recording or any other information storage and retrieval system, without prior permission in writing from the publisher.

Letter #1240

Lodovico ALIFIO to Ioannes DANTISCUS
Vilnius, 1534-11-19
            received [1534]-12-19

Manuscript sources:
1fair copy in Latin, autograph, AAWO, AB, D. 4, f. 30

Auxiliary sources:
1register in Polish, 20th-century, B. PAU-PAN, 8247 (TK 9), f. 663

Prints:
1AT 16/2 No. 587, p. 387-388 (in extenso; Polish register)

 

Text & apparatus & commentaryPlain textText & commentaryText & apparatus

 

Reverendissimo in Christo Patri et Domino, domino Iohanni Dantischo episcopo Chulmensi etc., domino [fratri os]servandissimo

Reverendissime in Christo Pater et Domine, mi domine plurimum osservande(!).

Solita servitiorum meorum commissione praemissa.

Accepi Dominationis Vestrae Reverendissimae litteras et perlegi ac doleo non posse opere complere, quod corde desidero, sub eo namque cardine res meae versantur apud serenissimam maiestatem reginalem, ut magis intercessorem indigeam, quam quod pro alio me intercessurum polliceri possim.

Nescio, quibus sinistris avibus Italiam petierim, ut omnia mihi infausta successerint nec mea culpa. Inimicorum meorum invidia falsisque calumniis tanta est in me serenissimae maiestatis reginalis mota indignatio, ut nullo pacto placari posse existimem. Feram patienti animo, quoad potero, tam graves fortunae vices. Consilium nobis resque tempusque dabunt.

Circa Dominationis Vestrae Reverendissimae negotium mentem meam domino Fabiano aperui. Is scribet abunde. Ego etsi raro in aulam me conferre soleam, accessi tamen serenissimam maiestatem reginalem et illius mentem erga personam Dominationis Vestrae Reverendissimae explorare volui. Dicebat aliquid esse scriptum, quod illius animo non sederat, tamen non video tantam indignationem, ut debeat illius aspectum vitare. Credo, si dabitur Dominationi Vestrae Reverendissimae coram copia fandi, se posse facillime expurgare et in pristinae gratiae candorem sese insinuare nemine alio patrocinante. Si quid tamen meis viribus exiguis attentare interea potero, quoad ista nubila depellantur, sinceram fidem et diligentem operam polliceor.

Commendo me et servitia mea eidem Vestrae Dominationi Reverendissimae, quae felicissime valeat et me mutuum diligat.

Datae Vilnae, die 19 Novembris 1534.

Eiusdem Vestrae Reverendissimae Dominationis ad mandata paratissimus Ludovicus Aliphius etc.