[R]everendo in Christo Patri, domino [Io]anni episcopo Culmensi sincere nobis dilecto

Bona Dei gratia regina Poloniae magna dux Lithuaniae, Russiae, Prussiae, Masoviaeque etc. domina

Reverende in Christo Pater sincere nobis dilecte

Habuimus hic binas Paternitatis Vestrae litteras, utrasque ad XXI Augusti Lubaviae datas, ex quibus cognovimus abunde ea omnia, quae ex relatione fratris sui germani et litteris domini episcopi Plocensis accepit, intellexisse Paternitatem Vestram contentaeque sumus, quia Paternitas Vestra susceperit eo animo monitionem nostram, quia illi semper parere, quod hactenus ait se diligentissime observasse, obtulit.

Quia autem Paternitas Vestra scripsit cupiens scire et sibi declarari, quibus in rebus deliquisse debuerit, ut tandem cautior fieret ad observandam voluntatem nostram, et quoniam nos non ignoramus Paternitatem Vestram non solum in his ac huiusmodi rebus, verum aliis gravissimis optime se gerere scire, non expedit hoc iterum hic repetere, nec refert locum et auctorem dicere, quandoquidem nos se confessorem in hac re profitemur fieri, qui non confitentem, sed peccata ipsa declarare voluimus eaque omnia in futurum referre ad eos, qui in sedes senatorias nuper hac mutatione positi, quo si noverint, in recto arbitrio componere [at]que omnes ad optatum scopum reducere pro bono regiae maiestatis et reipublicae.

Quod ad Kostkam attinet, cum quo Paternitas Vestra cuperet mutuam habere intelligentiam de curandis rebus regiis, gratum est hoc nobis audire, quod ut faciat Paternitas Vestra, nam ille non sua sed regia negotia curat, in quibus quantum potest non desit sibi, quo maiori fide et sollicitudine ac animo commoda regia curet, fatetur siquidem et ipse Paternitatis Vestrae animum propensum et favorem experiri.

De rege Britanniae cuperemus intelligere, an hoc verum sit, quod scripsit Paternitas Vestra de novo illius connubio, nam persuadere sibi non possumus, quod post hoc factum pellicis suae iudicium tam cito induxisset animum ad hoc properum connubium. Proinde Paternitas Vestra certius exploret, ut quod antea scripsimus, prosequeremur.

Paternitas Vestra recte valeat

Datae Vilnae, 3 Septembris anno Domini MDXXXVI-o.