BCK, 1597, p. 492

Reverendissimo in Christo Patri et Domino, domino Ioanni Dei gratia episcopo Varmiensi, fratri et maiori observando

BCK, 1597, p. 489

Reverendissime in Christo Pater et Domine, frater et maior observande.

Salutem et studiosam commendationem.

Remisit ad me dominus castellanus Gedanensis litteras in negotio accisae ad regiam maiestatem scriptas, easque duobus tantum sigillis, suo et domini palatini Marieburgensis, signatas, non significans, quae aut quorum nomina in subscriptione litterarum essent posita. Quod obstitit mihi ad dominum palatinum Culmensem missuro iuxta consilium domini de Baisen, quamquam opinor frustra id me facturum fuisse.

De domino palatino Pomeraniae, quemadmodum res habeat et quid iam consulat dominus castellanus Gedanensis, cum domino Ioanne a Werden, ex additis litteris et copiis, quae huc remittantur, Reverendissima Dominatio Vestra accipiet. Mira oblivio domini palatini Pomeraniae, si ita sentit, ut scribit. Non est dubium eum accepisse copiam litterarum regiarum ad Reverendissimam Dominationem Vestram, quibus inerat consensus regius, quem nunc negat se scivisse, nam simul cum litteris suspensionis conventus et aliis quibusdam, quae reddita illi sunt, haec missa fuit.

Omnino consultum non videtur litteras amandari sub trium tantum sigillis, deinde a me uno sustineri tantum pondus quod, ut solus sub hoc dissidio et contra institutum principum scribam, admodum grave mihi est et forte maioris periculi, quam fuit Reverendissimae Dominationi Vestrae ex omnium voto scribenti, nam quotusquisque agnoscet me ab se rogatum fuisse, ego vero auctor habebor rebellionis et conspirationis princeps, in quem omnis indignatio recidet, etiam si civitates nobis iungantur, quod nobis etiam augebit odium. Si vero ita haberent res Reverendissimae Dominationis Vestrae, ut se posset in scribendo coniungere mihi, non refragarer pro republica etiam hanc devorare molestiam, quam utique in parte levaret auctoritas Reverendissimae Dominationis Vestrae. Quam rogo, consulere mihi velit hac in re et scribere, quid ipsa de collecta accisa episcopatus sui factura sit.

Res trahitur in longum et adhuc dubium est an domini Thorunenses (a quibus in horas responsum exspecto) accessuri sint illi sententiae. Quod si fallet, cassa erunt omnia. Quin, si in aula sentietur dissensio nostra, quod certo eventurum non dubito, ludemus omnem operam. Si quid aliud sentit Reverendissima Dominatio Vestra et putat me honeste et sine periculo obsequi posse his consiliis, rogo ad me perscribere dignetur ac formam tradere, qua id fiat.

Commendo me amori Reverendissimae Dominationis Vestrae. Quam Dominus servet felicem diutissime.

Lubaviae, die XXV Ianuarii 1539.

Eiusdem Reverendissimae Dominationis Vestrae studiosissimus Tidemannus episcopus Culmensis