BCz, 1624, p. 164

Dem hochwirdigsten in Got fursten unnd herrn herrnn Johann von Gotts gnaden des loblichenn stiffts czu Ermelandt bisschowe etc. unnserm gennedigen herrn.

BCz, 1624, p. 163

Hochwirdigster inn Gott Furst, gennediger.

Unnser bereidtwillige unnd unvordrossene dienste seinndt Ewer H(ochwirdige) G(nade)n zcuvoran mit vleis entpholenn.

Gennediger Her.

Wi<e>r habenn in diesen tag(en) durch zcufertigung der ersamen von Thornn unnsser freunde brieff eine abschrifft konig(liche)r ma(yeste)t unnsers allergennedigstenn herren anndtwurth, zo auff der herren rethen diesser lannde an ihre m(ayesta)t ergang(en) unnd geschrieben / entpfangenn / unnd doraus ihrer konig(liche)n ma(yeste)t gemuthe zcum theile dermossen vermerkt, dass dasselbige vorschwt. / Unnd dweil hirauff notig ssein will solch ihrer ma(yeste)t anthwurt woll unnd aller notturfft noch zcu erweg(en) zcuberadtschlag(en) und anczumerckenn. / Damit derselbig(en) ihrer ma(yeste)t gemuth gelindert werden moge, dennoch das unser freÿheit unnd diesses unsers gemeinen vaterlandes gedeÿ unnd wolfarth nicht vergessen. /

Hierum(m)b wollen wir der eigentlichen zuvorsicht sein E(uer)H(ochwirdige) G(nade) werde solch koniglich andtwurt derselbig(en) gelegenheit nach / mith anderen herren unnd den fur nehensten rethen diesses landes will beradthschlag(en) unnd behertzig(en), / unnd wen alsdan solchs ferner an uns gelangen wirth wollen wir uns unserem beruffe noch / was Goth unnd allerseits notturfft vor leyenn unnd geben wirth. /

Auch unsser bedencken gerne mitteteilen welchs wir E(uer)H(ochwirdige) G(nade) dinstlicher wolmeÿnung nicht haben wissen zcu bergenn, / dan derselbig(en) E(uer)H(ochwirdige) G(nade) (die wir hiemit Gothe in langweriger gesundtheit unnd sseligklich entphelen) in allem gutte zcu wilfaren sseindt wir geflisssenn.

Dat(um) Danntzig, am 5 Decembris anno etc. 41.

Ewer H(ochwirdig)e G(nade)n dinstwillige burgermeister unnd rathman der stadt Danntzigk