Dem hochwirdigen fursten / unnd herrn/ herrn Johann bischoven zu Ermelandt / unnd der kuniglichen lande Preyssen rats president, / meinen gnedigen herrn /

Bresslaw

Hochwirdiger Furst. /

Ewrn Furstlichn Gnaden sein mein underthenig / willig dienst yeder zeit zuvor berait. /

Gnediger Herr. /

Ewr Furstlich Gnaden schreiben des datum auf derselben schloss Braunsberg den sibenden tag verschinen monats Augusti / hab ich emphanngen, / daraus, / das dieselb meinem diener Hansen Preten zu Danntzkha an den hundert ducaten, / so ich Ewr Furstlich Gnaden öhem, / herren Casparn Hannaw zu Rom zu bezahlen verordnet, / achtzigk dukaten, / und noch an muntz ainhundert ducaten, / so ich auch über vorig hundert ducat[en] gedachtem herren Casparn Hannaw zu Rom von Ewr Furstlich Gnaden wegen yetzo zuzalen verordnen soll, / erlegen und zuestellen lassen, / er Hanns Pred aber sollich gelt, / weil er des von mir nit in bevelch hat, / nit annemen wellen, / mit gnedigem beger, / bey beruerttem meinem diener sollich gelt anzenemen, / und die hundert ducaten dem Hannaw zu Rom zu bezahlen / verschaffen. / Ferrers innhalts vernomen, / und wiewohl mir (wie ich Ewr Furstlich Gnaden hievor auch verständigt) gar verlegen, / weil ich mich der handlungen in Ytalia gar entschlagen, / sollich gellt zu Rom erlegen, / und zalen zelassen. / Noch dann derselben zu underthenigem gefallen, / weil ich verordnen, / das man gemeltem herren Casparn Hannaw solliche ainhunder[t] ducaten in Rom erlegt, / und bezalt werden, / dergleich[n] von Ewrn Furstlich Gnaden durch Hanns Preden (welcher yetzo nit anhaim sonder am herreitten zu mir ist) wann er w[ie] anhaim kumbt, / die vorigen resierenden achtzig ducaten dergleichen yetzige hundert ducaten sollen angenomen / werden. / Wie dann Ewr Furstlich Gnaden verrer an mich begern, / derselben burgermeister / unnd ratmannen der stat Braunsperg zwainzig centen dachkupfer / zu teckhung des kirchenthurns daselbst / durch Hanns Preden geben / unnd sollich kupfer, / nemblich yedes jars ainhundert march preissisch, / bis die suma so es anlauff[n] wirt, / gar bezalt, / meiner zelassen. / Das wil ich als abschaiden Hanns Preds / bey ime zubeschen / veror[dnen] unnd Ewrn Furstlich Gnaden yeder zeit underthenigen willen beweisen / bin ich berait. / Wolt ich Ewrn Furstlich Gnaden dero schreiben, / welcher ich mich auch underthe[nig] bevelhen thue, / nicht verhalten. /

Datum Augspurg, XXVI-ten tag Septembris / anno DXLIIII.

Ewr Gnaden gutwilliger Antoni Fugger subscripsit