Nobilis et Eximie Domine, domine in Christo plurimum dilecte.

Salutem Dominationi Vestrae felicemque itum et reditum ad eam profectionem, quam suscepit, precamur.

Mittimus ad magnificum dominum Cornelium Scepperum litteras earumque exemplum, ex quo Dominatio Vestra habebit commendationem nostram ad illum et quid cum eo agere debeat. Haud dubie Dominationi Vestrae aderit in omnibus , cum eo etiam de singulis libere poterit colloqui, in negotio praesertim, quod ad Hanburgenses pertinet. Cuius velimus Dominatio Vestra a spectabili domino Georgio Scheffke burgrabio et praeconsuli Gedanensi uberiorem capiat informationem. In hocque intendat quantum potest, cum feliciter ad aulam Belgicam sospes appulerit, si quis ex ea ad honorandas nuptias serenissimi regis iunioris mitti debeat, quemadmodum existimamus serenissimam reginam Hungariae facturam, ut dominus Cornelius mihi intime carissimus mittatur. De quo cum principibus viris illius aulae tractare poterit, ea ratione, utpote quod dominus Cornelius prius a maiestate caesarea ex Hispaniis, cum ibidem ageremus, usque in Lithuaniam ad serenissimam maiestatem regiam orator missus fuerit, magnamque sibi gratiam apud serenissimos reges nostros atque apud omnes curiae nostrae primores compararit, neminemque ob id, quod gratiosus sit apud omnes, nostris gratiorem futurum. Hoc Dominatio Vestra (quod illius industrie committimus) aulice tractare sciet etc.

Scripsi item srenissimae reginae Hungariae thesaurario domino Volffgango Haller, ut si dominus Cornelius absens fuerit, ad quem tamen Dominatio Vestra litteras nostras mittet, ut ille Dominationi Vestrae suam benevolentiam et in omnibus agendis operam impendat. Quod sine ulla haesitantia, ut nobis certo persuademus, faciet.

Magnifico domino Cornelio per iocum Dominatio Vestra nostro nomine dicet, quod si a nobis solitum tributum Iopensis potus habere cupit, efficiat, ut angustiae Danici freti reserentur, et quod nos minime suspectos habeat, quasi parti adversae faveremus, cum nobis illius machinae, quae imprimis religioni, a qua descivit, ipsique aequitati sint contrariae, numquam nobis placuerint.

Reliqua, quae apud nos aguntur, illi Dominatio Vestra confidenter referet, experietur eum, modo praesens fuerit, in omnibus commodum atque sincerum amicum. Cui a nobis atque aliis omnibus in ea aula amicis nostris ut Dominatio Vestra nostro nomine plurimam salutem impartiat, rogamus.

Eandemque feliciter valere, felicissime, quo tendit, ire redireque ad nos optamus ex animo.

Datae Heilsberg, [XXI]X Ianuar[ii 1]543.