Dem Hochwirdigenn in God Fursten unnd Herren, hern Ioanni von Gotes gnaden bischoff zu Ermelanth, unserm gnedigen herren unnd patronen

Hochwirdiger in God Furst, / Gnediger Herre. /

Unsere bereidwillige, ungesparte dienste seinth Ewer Hochwirdigsten Gnaden stetes zuvor bereid. /

Gnediger Herre.

Als unser secretarius vor ehrgesternnn einheimisch gekommenn, / hath er unns angezeigeth den gnedigen wollmenenden rad, / willen / unnd sunderlichen fleis so Ewer Hochwirdigsten Gnaden in ubersehunge des ubergsanten brifes gehabth, / davor wir Ewer Hochwirdigsten Gnaden dinstlich dancken und unns erbitenn solchs alles nach gelegenheith unsers vermoegens in besten zu vordienen. / Unnd dweill wir dan unsere unschulth wegen des geleites, das von unns solte gebrachen sein, koniglicher maiestäth unser aller gnädigster herr sollenn zu schreiben, / so haben wir diesen unsern diener nach Ewer Hochwirdigsten Gnaden gnedigen rad auff Heilspperg zu reiten bevolenn. / Dinstlich bithende Ewer Hochwirdigsten Gnaden wollen in vermerkunge unser unschuldth / nach geschenen gnedigen vortrostunge unns mith Ewer Hochwirdigsten Gnaden forderschriffth an die konigliche maiestäth / und sunst in der Kronen an die herschaffth so Ewer Hochwirdigsten Gnaden am bekemsten deucht / behulfflich sein, / damith wir desto füglicher der beschenen bezichtigunge mochten gefreieth werden. /

Was belangeth das schreiben, / welchs Ewer Hochwirdigsten Gnaden iun <g> st an uns gethan mith einer eingeschlossen copeÿ eines brifes, welchem furstliche durchlaucht in Preussen Ewer Hochwirdigsten Gnaden gsanth, / des abeschriffth haben wir ane allem verzuge den ersamen von Torn und Danzig / und die andern beigelegthen briffe an den hern Marienburgschen woiwoden / und an die fraw vonn Roghausen gesanth. / Unnd wissen auff dis mahell nach erheischunge unser pflichten / dweill von koniglicher maiestät nach zur zeith auff voriges der herren rethe schreiben kein andworth uns zugekommen / verner auch keinen rad und bedencken von uns zu schreiben und lassen uns gevallen das andworth so Ewer Hochwirdigsten Gnaden furstlicher durchlaucht drauff gegebenn. /

Sunst Ewer Hochwirdigsten Gnaden / die wir Gothe lange gsunth empfelen angenome dienste zu erzeigenn thun wir willig unnd gerne. /

Datum Elbinge, ahm abend Mariae Magdalenae anno XLVII.

Ewer Hochwirdigsten Gnaden dinstwillige burgermestere und radmanne koniglicher stad Elbing