Martino Alexwange

Salutem.

Honeste in Christo nobis dilecte.

Gratae nobis fuerunt tuae litterae, eo quod illis quaedam de concilio, quae libenter intelleximus, addideras. Et hortamur te, ut talia et his similia , quae apud vos in aula fiunt et etiam aliunde eo adferuntur, saepiu[s] et quoties nuntios habere poteris, ad nos describas, ea enim re nobis gratum facies et cotidie nostram in te benevolentiam et propensionem tibi reddes cumulatiorem, ita ut non simus tibi in i[is], quae ad promotionem tuam pertinebunt, defuturi.

Quod etiam in superioribus nostris litteris ad dominum doctorem Hoseum facere non intermisimus. Qui nobis respondit et promittit, quod te captato tempore et loco oportuno domino reverendissimo commendare non velit negligere. Hoc ut faciat, nunc denuo ab eo petimus. Tu modo sat age rebus tuis et, quandocumque nobis scriptionibus tuis gratificari poteris, noli intermittere.

Bene vale.

Datae ex arce nostra Heilsberg, XX <Augusti> MDXLVII.