» CORPUS of Ioannes Dantiscus' Texts & Correspondence
Copyright © Laboratory for Source Editing and Digital Humanities AL UW

All Rights Reserved. No part of this publication may be reproduced or transmitted in any form or by any means, electronic or mechanical, including photocopy, recording or any other information storage and retrieval system, without prior permission in writing from the publisher.

Letter #3571

Mauritius FERBER to Ioannes DANTISCUS
Heilsberg (Lidzbark Warmiński), 1533-08-03
            received 1533-08-06

Manuscript sources:
1fair copy in Latin, autograph, in secretary's hand, author's signature, BCz, 1595, p. 573-576
2office copy in Latin, AAWO, AB, A 1, No. 845, f. 366v-367r

Auxiliary sources:
1register in Polish, 20th-century, B. PAU-PAN, 8247 (TK 9), f. 333

Prints:
1AT 15 No. 386, p. 530-531 (in extenso; Polish register)

 

Text & apparatus & commentaryPlain textText & commentaryText & apparatus

 

Reverendissimo in Christo Patri et Domino, domino Ioanni Dei gratia episcopo Culmensi, fratri et amico carissimo ac plurimum honorando

Reverendissime in Christo Pater et Domine, amice praestantissime et frater in Christo carissime.

Litteras Reverendissimae Dominationis Vestrae ex manibus secretarii eius recepi et non modo non est molesta Reverendissima Dominatio Vestra, verum etiam gratissimum semper mihi facit, quod litteris suis me frequenter invisit idque, ut coepit, ita et iure amicitiae inter nos firmatae facere pergat, rogo. Et si quod scribat aliud nihil habet, saltem hoc quod nihil habet, scribat, immo, ut saltem manus suae inspectione molestias adversae valetudinis meae aliqua ex parte levem efficere non intermittat. Erit hoc mihi tam gratum, quam quod gratissimum.

Insuper pro novitatibus communicatis et mihi admodum auditu gratis gratias ago. Quibus vero paria faciam et hac in parte amori Reverendissimae Dominationis Vestrae respondeam, apud me sunt hoc tempore nullae, quae ipsam lateant.

Ceterum quia Dominatio Vestra Reverendissima litteras ex urbe Roma habuit, utile atque adeo necessarium est mihi scire, an ista dispensatio pro Bartholomeo Grefe consule Elbingensi (cui ad intercessionem Reverendissimae Dominationis Vestrae terminum huiusmodi dispensationis expediendae usque ad festum divi Michaelis proximum iterum prorogavi) expedita sit, ut itaque de hoc Dominatio Vestra Reverendissima me certiorem reddat, percupio. Nam res est pessimi exempli et in multorum, paria audentium offendiculum, hactenus tolerata et diutius quam ad praestitutum terminum festi divi Michaelis haud quaquam toleranda.

In monetario praeterea negotio ita me gessi et adhuc geram, ut vigilantia et studium meum nulla in parte desiderari possit, quemadmodum etiam in proximis meis litteris nonnihil attigi. Nunc aliud in eo negotio scribendum non venit, quam hoc, quod sciam, aurum insigniter ascendere ita, ut florenus Rhenensis hodie Gedani ematur semiduabus marchis et quinque solidis. Quid inde sequetur Reverendissima Dominatio Vestra, quae est sua prudentia, expendet. Nam ubi ad commodum non publicum, sed privatum, moneta excuditur, quod nihil inde boni sequi possit, nemo non vel mediocriter sapiens videt. Quid itaque in hac re faciendum interea, donec in proximum conventum venturi sumus, cogitandum est.

Reverendissimam Dominationem Vestram felicem conservet et in omnibus prosperet Christus.

Ex Heilsberg, 3 Augusti anno 1533.

Vestrae Reverendissimae Dominationis in omnibus Mauritius episcopus Warmiensis scripsit

Postscript:

Litterae hic inclusae, ut apparent, per plurimorum manus iactatae, nudius tertius rursus impraemeditate ad me rediere, quas nunc mitto. Cui commissae erant, non sinceriter a se extrusit, quam incuriam boni consulere dignetur Vestra Reverendissima Dominatio, cui me iterum atque iterum commendo.