Meo Reverendissmo et imprimis Colendissimo Domino, domino episcopo Varmiensi

Reverendissime in Christo Pater et Domine, domine mihi colendissime.

Commendata servitute mea in gratiam Dominationis Vestrae Reverendissimae.

Litteras Dominationis Vestrae Reverendissimae legi maiestati regiae et schedam in litteris inclusam in manus suae maiestatis tradidi. Ipsa eam legit et nemini ostendit. Credo, postea conscidit, ut solet eiusmodi schedas.

De lacu Drausen respondit maiestas regia, quod lacus ille non est hypothecatus, sed ad certum tempus tantummodo certa summa locatus, cuius temporis annus adhuc superest neque hoc anno aliquid aliud statuetur. Quare ego arbitror consultum, ut domini Elbingenses rem suam intra hunc annum curent, nam sunt, qui pluris multo conducere volunt lacum illum.

Articuli illi Prutenici reperiri non possunt, sed si reperientur vel per Dominationem Vestram Reverendissimam mittentur, confirmabuntur.

Decretum maiestatis regiae in causa Voskova <e> confeci et illud vel ipse dominus Gedanensis castellanus, vel servitor eius Dominationi Vestrae Reverendissimae afferet. Schedam etiam mihi cratulam tum mittam. De domino episcopo Culmensi maiestas regia factura est omnia, quando eius litterae advenient.

De negotio domini Slussevski sic videtur maiestati regiae, ut citetur et, cum utraque pars comparebi[t], regia maiestas interpretabitur privilegi[um], de quibus marcis intelligi de[bea]t, Prutenicis an Polonicis. Tamets[i] nunc etiam videtur maiestati suae, ut Prutenicae solvantur, novi tam[en] instituti.

Haec fere equum conscendens scripsi, quare ignoscet Dominatio Vestra Reverendissima festinationi meae.

Cuius gratiae me iterum atque iterum commendo et domino Culmensi atque domino a Verden per illam commendari cupio.

Opto Dominationi Vestrae Reverendissimae bonam et diuturnam valetudinem, felicitatem prolixam.

Datae Cracoviae, quarta Iulii 15XXXVIII.

Eiusdem Dominationis Vestrae Reverendissimae servitor et capellanus Samuel Macyeiovski decanus