Hern Zcemenn

Unsernn etc.

Ewer Herlichkeit schreibenn, / am abent Sankt Martini von Leris... an uns ausgangenn , / hab wir vor korczenn tagenn erhaltenn und daraus die sache zcwischen Burgundien und Dennemarken do v[on] uns ouch furstliche durchlaucht den XXVII dis negst vorschinen monts geschribnn, / m[it] fleis bey uns bewogenn, / in dem nemlich, / was sich daraus dissen landen und allenn zu unhrwe und sverheit mocht b[e]gebenn, / solchem vorzukomenn, / ouch furstlicher durchlaucht wilferige dinste zu bew[ei]senn, / die uns derhalbenn schrifftlich, / wie gemelt, / ersucht, / sehe wir vor das beste ann, / das Ewer Herlichkeit in nhamenn der hern rethe mit einer instruction dissem handel nuczlich ann konigliche majestet unsern allergnedigsten hern mit den ersten wurd gefertiget, die, welche aus furstliche durchlaucht roth und angeben, / alse die disser sachen gelegenheit uffs volkomlichste weis, / geseczt und gestelt were. / Derwegenn wir ouch furstlicher durchlaucht geschribenn, / wie dan dis vornemens allenn bescheidt und bericht, / der erbare, ersam unser bsond[er] gutter freundt, her Jorge Moller / Ewer Herlichkeit wirt anczeigen / uff den wir uns referirenn / und hiemit Ewer Herlichkeit gotlichnn gnaden befelenn.

Datum aus unserm schlosse Heilsberg, XXVII Novembris M D XLIII.