Unsern fruntlichnn grus und alles guttnn zuvorann. Ersamer, lieber her Hans, bsunder gutterr, alter freundt.

Wie wir aus gotlichen gnaden gesunt mit den unsernn hie her gelangt und all die unserr in gutterr gesuntheit und [o]rdnung gefunden, / hab wir nicht noch mocht lossen, / so wir hiemit / unsermm guttnn freunde Jorgen Hegel, was er uns geligen, wider schicken, / Euch ouch durch dis unser schreiben zu besuchnn, / und bedancken Euch ins erst der gutten freuntschafft unnd geselschafft, die ir uns in Ewremm hause beweist und geleist habt. / Wollen ouch solchs umb Euch und die Ewrenn und nemlich mit der zusage Ewrmm son, / dieweil er wirt sein in welchnn landen, mit aller woltath beschuldenn etc. Wir hetten Euch dis mol fast gernn ein feslein wiltnis oll / zugeschickt, / sold uns ouch zu theur nicht sein gewest, / solcher ol ist aber disse zceit hie nicht zu uberkomenn, / ummb pfingsten erst wirt sich der olfang wider zutragen, / als dan wolle wir Ewer nicht vorgessenn etc.

Ewren briff an denn hern von Heilsberg hab wir in unser ankumfft hie herr durch eigenen botnn lossen antwurten.

Hiemit Gote in sein gnaden befholen. / Grust von unsernn wegen ewer togentszame hausfrau / und die fraw Karlin, / ouch in selbst, so er heym ist komenn, und alle gutte freunde.

Datum aus unsermm slosse Lobau, den ... Marcii M D XXXVII.