Denn ersamen, namhafftigenn hern burgermeis[ter] der koniglichen stadt Danczk, [un]sernn gunstigen freunden

Unsernn fruntlichenn grues mit erbittung alles guttenn zcuvoran. /

Ersame namhafftige hernn, gunstige freunde. /

Wir sein durch denn edlen, wolgeborn hernn danczker castellan bericht aus Ewr Erbarkeit schreibenn, an in gethan, / wie das die besendung an konigliche majestet, unsern allergnedigsten hernn, / negst uff Ewr Erbarkeit geschickten bethe und vorwillung der hernn land unnd stette / durch Ewr Erbarkeit gelegt / unnd, wie zuegesagt, / zcwschicken, / wie es in unsernn recessen negst gehaltner tagfart entslossen, / nicht gewilliget, / sunder ein secretarien in ewern egenen geschefftenn / an konigliche majestet abczufertigen, / das uns / jo ouch so befrembt, als uns erkein sache je ist vorkommen, / nemlich so Ewr Erbarkeit / die hernn landt unnd stette swerlich durch bitt ewr geschickten / und durch unsern fleis und beistandt / darein gefurt und bewegt. / Wie in das / unnd uns furderlich / mag gefallenn / und euch wol czimen wil, / hot Ewr Erbarkeit wol zcwbedencken, / derhalbenn wir weitlofftig mit dem edlen namhafftigen hern houptman zcw der Newenburgk / und Ewr Erbarkeit mittel burgermeister uns haben underredt, / uff denn wir uns weiter thun czyhen, / bittend und fruntlich vormanend, euch so hir inne wolt erczegen, / das unserm schreiben manchfaldig an konigliche majestet und andere hern der kron vor Ewr Erbarkeit unnd der gutten stadt zcw ehren und besten / nicht wurde vorungelimfft, / und Ewr Erbarkeit daraus nicht nochteil ouch unfruntschafft entstunde. /

Dis hab wir so, Ewr Erbarkeit Gotte dem allemechtigen befelend, nicht mocht bergenn. /

Datum uff unserm slosse Altenhaus, 30 Octobris 1533.

Ioannes, bischoff zu Culmen manu propria