Dem ersamen, namhafftigen hern ⌊Burgermeister und Rodtmannen / der koniglichen stadt Danczke⌋, unsern gunstigen freunden.
Unsernn fruntlichen grues und was wir liebs unnd fruntlichs wolgefallens vormugen zuvoran. / Ersame, namhafftige hern, gunstige freunde. /
Wir schicken Ewer Erbarkeit beÿ dem achtbarn, hochgelerten hern doctorn ⌊Iohan Reÿnecken⌋ die ausschrifft des briffs, von hÿnnen in nhamen der ⌊hern land und stet⌋ gegangen, und dem edlen, gestrengen hern ⌊Danczker castellan⌋ an ⌊konigliche majestet⌋, unsern allergnedigsten hern, mitgeben, daraus sich Ewer Erbarkeit aller hendel wirt mugen erkunden. /
Die legacion haben Ewer Erbarkeit zuvor aus negster ⌊tagfart⌋ von ⌊Graudencz⌋. / Doneben, so gedochter ⌊her doctor⌋ wurd von unsern wegen in unsern und seÿnen sachen Ewer Erbarkeit hulff unnd furdrung begeren, / bitten wir, wolt im fruntlich vorhorung und solche hulff und furderung mitteilin, / das wir umb Ewer Erbarkeit, / die wir Gote dem almechtigen in sein gnad thun befhelen, gern zuvorschulden wollen geflissenn sein. /
Datum aus unserm slosse ⌊Lobaw⌋, XXI Ianuarii 1534.
Ioannes, von Gots gnaden bischoff zu Culmenn, administrator des ⌊bischtumbs Pomezan⌋.
Postscript:
Was belangt die togentsame ⌊witwe⌋ ⌊Caspar Schillings⌋ noch gelossen / und ⌊Hans Holsten⌋, / wie wir in negsten / Ewr Erbarkeit ⌊⌋, / werden wir bericht, / das ir widertheil nicht fast zw fruntlichem vortrag seÿ bewogen / und vorlengerung der sachen noch sthe. / Wolten derwegen nicht gern, das imandts von in / in seÿnem / recht suld vorkurczt werden, / wie wol wir gernn mochten sehen, / das disser handel fruntlich wurdt hingelegt. / Bitten derwegen, / so freuntlich die sache nicht mag entscheden werden, / wolten sÿe beÿ irem / recht lossen bleiben etc.
Uns gedenckt ouch, das wir zw ⌊Danczke⌋ beÿ Ewr Erbarkeit wesende eÿne vorbit unser elste ⌊schwester⌋, / doctor / ⌊Hans Reineck⌋ gemahel, / belangende, / salcz czum stheur aus irem keller zuvorkouffen zw gunstende, / wie dan ouch andren zwgelossen etc., uff welchs wir ⌊den zw Danczke⌋ Ewre wilferige antwurt erhoret. / Hoffen ouch noch und bitten gutlich, Ewr Erbarkeit wollen uns zw freuntlichem wolgefallen unserr ⌊swester⌋ auff etlich jar mit solcher freiheit begunstegen. / Das vorschulde wir umb Ewr Erbarkeit alczeit gerne.
