Den ersamen, nhamhafftigen hern burgemeyster und rathmane der konniglichen stadt Dantzke, unsern gunstigen freunden.

Unsern freuntlichen grus mit alles guthn wunschung zuvoran. / Ersame, nhamhafftige hernn, gunstige freunde. /

Dysen thag hab wir Ewer Erbarkeit schreyben erhalten, / und gefeldt uns Ewer Erbarkeit meynung wol / in der vorlegung der thagfhart bis uff Michaelis. / Es wil aber vonnothen sein, / wy es auch der hochwirdig herr von Culmhese vor das beste angesehen, / des dy herrn woyewoden und castellanen yn eynnem offenem brive mit yren unden angedruckten sygeln, / und dergleich Ewer Erbarketi, in sonderheit mit den ersamen von Thorn und Elbing, solche vorlegung mit yren ursachen / und bedingung, / wy Ewer Erbarkeit schreyben mit brengt, / von koniglicher majestet, unserem allergnedigsten hernn, thun bytten, / welche brive wir gerne mit eygenem bothen neben dem unsern an konigliche majestet wollen schickenn, / domit uns dester mher glawben werde geben. / Sonst wirt am hove gedacht, (: dyweyl wir in solchem unfhal getzogen :) es kam alles von uns selbst, / was wir ins lands notlichen geschefftennn von uns schreyben. / Das hab wir Ewer Erbarkeit, dy wir in aller wolfhart gotlichen gnaden befhelhen, / uff ir schreybenn / guter, freuntlicher weys nicht mugen vorhalthenn. /

Datum auss unserm sloss Heylsberg, den VII Iunii M D XXXIXten.

Ioannes, von Gots gnadenn byschoff zu Ermelandt.