Dem ersamen und namhafftigenn hern ⌊Georgen Schefeke⌋, burgermeister der khonigliche stadt ⌊Dantzig⌋, unserm besondern, vilgelipten freunde.
Unnsernn freuntlichenn grus / unnd alles guttenn zuvoran. Ersamer, namhafftiger her, vilgelibter freundt. /
Es hot unns der erbar unnd ernfeste ⌊George vonn Houen⌋, / anders genant Flachbinder, unnser lieber bruder unnd gethreuer, / heuptman zw ⌊Resell⌋, schriefftlich ⌊⌋, wie Ewer Erbarkeit unnd derselbtenn liebe ⌊hausfraw⌋ / mit des steins wetage sein beschweret, / das unns inn rechter worheit hertzlich leit ist. / Wuste wir hirinn wormit was nutzlichs rothenn oder helffenn, thet wir nicht wynnigers gern, / alse uns selbst. Was inn unnserm vormugenn ist, / wolle wir Gott denn almechtigenn bittenn, / das sein gotliche barmhertzigheit Ewer Erbarkeit und derselbten lieben ⌊hausfrawen⌋ die entzogene gesuntheit wiederumb zulangenn zeittenn volkomen erstatt unnd verleyhe etc. Wir habenn auch diese tage am stein nicht wenig vordriess entfundenn, / des wir noch nicht gentzlich loss sein. / Gott der strafft, die er liebt. / Dem sol wir vor alles, das uns zufelt, / danckenn / und gnad bitten, / der wolle auch Ewer Erbarkeit unnd derselbtenn liebe ⌊hausfraw⌋ / gnediglich befolenn habenn unnd im kortzenn gesunt wieder auff helffenn. /
