Reverendissimo in Christo Patri et Domino, domino Ioanni Dei gratia episcopo Culmensi, coadiutori Wamiensi et administratori ecclesiae Pomezaniensis, domino suo colendissimo

Reverendissime in Christo Pater et Domine, domine observandissime.

Servitiorum meorum humili commendatione praemissa.

Ut hic instans annus Reverendissimae Dominationis Vestrae felix faustusque sit, precor. Bonum omen mihi scripsit reverendissimus episcopus Warmiensis Reverendissimam Dominationem Vestram electam esse capitulariter in coadiutorem cum successione, quamvis, ut dicitur, quidam recalcitrare nituntur, sed maior et sanior pars praecedet. Ego hilari fronte legi litteras et statim felicitatem precatus sum.

Reverendissime domine, scribo in praesens reverendissimo episcopo Plocensi, ut qui hucusque habenas direxerit. Est spes unum sibi officium committi vel cancellariatus, vel vicecancellariatus. Et quia oportuit litteras secundario scribere, visum est Reverendissimae Dominationi Vestrae exemplar mittere, ut quando cum reverendissimo Plocensi conferendum foret, ut Paternitas Vestra sciat, quid optaverim et in quibus causis scripserim. Velim Reverendissimam Dominationem Vestram obnixe rogatam habere, ne velit gravari ea, quae scripsi de filio meo, sollicitare coram regia maiestate una cum domino castellano Gdanensi et domino Ioanne a Werdum etc. Scripsi etiam in ea causa illustrissimo principi Prussiae, si forte, ut dicitur, sua illustrissima dominatio illic Cracoviae est, et spero suam illustritatem non gravate facturam. Spe bona alor Reverendissimam Dominationem Vestram mei intuitu non recusare onus hoc subire.

Anhelo scire, qualiter res illic agantur, praesertim cum nuntiis districtuum harum terrarum, qualiter res eorum illic conspiciuntur. Aestimo, quod habeant promotoriales a domino Kostka etc., qui auctor et director est huius tragoediae, et illum quidam alii sequuntur. Collega Reverendissimae Dominationis Vestrae tametsi negat, sed multum suspectus est etc. Ego apud me cogito grave fuisse Dominationi Vestrae nesciens, cui fidat seu cui se credat. Refocillabitur autem adveniente domino castellano Gdanensi etc. Deus omnia derigat in melius.

Dicitu, quod nuntii districtuum regni acriter instant has terras sub iugum ponere, ut onera regni nos aeque ac ipsi feramus. Haec causa merito deberet nobilitatem nostram terrere, ut resipiscerent, ne se gravibus oneribus subiciant, quae ferri non possunt nec patres nostri tulerunt.

Primores nostri pro iustitia et libertate favenda, ut privilegium sonat, ab iniustis dominis regi, ut iusto domino, se subdiderunt, quo in libertate et iustitia conservarentur. Et serenissima maiestas regia inscripsit in libertate, iustitia et antiqua consuetudine has terras conservare.

Iam passim fere omnia privilegia sonant, quod sint astricti pro defensione terrae Prussiae nec ultra limites. Confidimus ergo in serenissima maiestate regia, quod nos servabit in ea libertate, iuribus et iustitia, prout serenissimus olim pater et fratres servaverunt. Subditos nos profitemur serenissimorum regum, dominos autem Polonos pro fratribus rogantes, ne velint nos in iuribus nostris, libertate et iustitia impedire, quin immo nobiscum regiam celsitudinem rogatam habere, quo sua maiestas quemlibet in suo iure, privilegio, praerogativa ac consuetudine conservare dignetur. Onera autem regni portare non est in posse nostro, nec relevaret in aliquo incolas regni, solum quidem calumniam nostram riderent, quam incolae Prussiae deplangerent. Attamen incolae Prussiae sunt proni ac benevoli maiestati regiae inservire et, ubi res expostulare videbitur, contributiones non negare et pronunc opera nostra spectata erat, nisi quidam obstetissent, qui nobilitatem alio deflexerint cum detrimento rei publicae et sui ipsius, non tamen volunt esse culpabiles etc.

Cum his me servitiaque mea Reverendissimae Dominationi Vestrae commendata esse cupio.

Ex Meva, tertia Ianuarii anno tricesimo septimo super sesquimillesimum.

Eiusdem Reverendissimae Dominationis Vestrae observandissimus Georgius a Baysen etc. capitaneus Gnevensis etc. scripsit.