Dem Hochwirdigenn in God Furstenn unnd Herrenn, herrenn Ioanni von Gottis gnadenn bisschove zw Culmensehe, administratori zw Pomezan unnd postulato zw Ermelanndt etc., unsrem gnedigenn herrenn

Hochwirdiger in Godt Furst, / Gnediger Herre.

Unnsre wilferttige unverdrossenn unnd gantz bereittenn diennste seint ewern hochwirdigenn gnadenn / ungesparttes wleyses / zuvorann erbottenn / unnd gantz dinstlich empfolenn / aws besonnder tzwgethuenem wleisse / mudt / unnd hertzenn. /

Gnediger Herre. /

Ist unns anmuttig / unnd tzw hörenn ein besonnder frewde gewesenn, / das Ewer Hochwirdigen Gnaden aws godtlichem beruff zw yres stanndts erhöhunge / nachmals awch mit bewilligunge bepstlicher heylikeit / yn das löblich bisthtumb Ermelanndt / inautoriret(!) / unnd zw einglichem besitz desselbigenn / gekomenn, / dartzw Ewer Hochwirdigen Gnaden wir gantz dinstlichs wleysses viel gelucks, ein langverige, friedliche / unnd zelige regirunge von Gotte wunschenn unnd bittenn / untzweiffelhaffttiger unnd gantz trostlicher zuversicht, / dieselbe unns und unnserer stadt, / als yrenn / der geistlikeit nach / eingewidmethenn, / ein gnediger herre sein / unnd nichts weniger dan yre zeligen vorfarnn mit gnadenn gnedliglich ummbegebenn. /

Weitter wie und als denne Ewer Hochwirdigen Gnaden eins etzlichenn buchleins halbenn / so hoch mylder gedechtnus bisschoff Lucas mit zwthat magistri Pauli Dewsterwaldts, / fast viele unnd nutzliche antiquitet / sowol disses lanndts / als ouch der crewtzherrenn / ynhalttent, / zwsamen gebracht / geschriebenn / unnd wie Ewer Hochwirdigen Gnaden berichtsweise eingenommen. Nach absterben magistri Pauli dasselbe buchlein an uns solte sein geflossen / unnd also derwegen[n] [ge]melts buchleins original / daraws ein abeschryfft zw machen / Ewer Hochwirdigen Gnaden volgenn tzw lassenn gnediglich gesonnenn wollenn. Ewer Hochwirdigen Gnaden wir dinstlicher meinunge antwortsweise hinwidderummb nicht verhalttenn. / Das nach tode zeligenn magistri Pauli seiner bucher keins an uns glanget adir gekomenn.

Besonnder dieselbigen zum theile / als ein inventarium / bey der wydme gebliebenn zum theile auch / eynem etzlichenn thummbherrenn tzwr Gudtstadt zeligem magistro Paulo etzlicher maesenn verwandt / beschedenn unnd legiret wurden, daruber auch / als wir berichttet werdenn / bey tzeit zeligen her Johan Ferbers viele seyner bucher von der widme hinweg gekomenn, wie dem allem, / Gnediger Herre, / wollenn wir mit allem wleisse doran sein, ob wir uff eynigerley spur / sollich buchlein zw erforsschenn / komen möchten, / dan Ewer Hochwirdigen Gnaden dafur es gnediglich achtenn soll / so dasselbe bey unns enthaltenn, Ewer Hochwirdigen Gnaden mit gantz wolgeneygttem willenn volgenn unnd unverhalttenn sein solde. / Szo dergeleichenn awch whe es bey yemandts unnsers tzwthuens kunde adir mochte gespuret adir befundenn werdenn, dasselbe unvortzögenlich Ewer Hochwirdigen Gnaden tzw gestellet solte unnd obirantwerttet werdenn. /

Dem almechttigenn Ewer Hochwirdigen Gnaden hirmit zw lang vorhafftten tagenn gesunth unnd zelig bevolen.

Geben eilendt zum Elbinge, den 9 Ianuarii anno etc. XXXVIII-ten.

Ewer Hochwirdigen Gnaden dinstwillige burgermeister und radtmanne der stadt Elbingk