Dem hochwirdigsten in Goth furstennn unde hern, herren Ioanni von Gotis genaden des loblichennn stichts Ermelant bisschove etc., meynemm genedigen hernnn.

Hochwyrdigster in Goth Furste, Genediger Herre.

Meyne gancz unvordrosszene unde stethe wyllige dynste szeynt Ewer Furstlichen Genoden zcuvorannn bereth unde enthpholennn.

Genediger Herre.

Ich byn hochlich erfrowet Ewer Ffurstlichen [Genoden] ... [geszund]heytt. / Goth szey eer unde lopp dovor. We... ist eyn reden geweszennn, why Ewer Ffurstlichen Genoden were ... geben unde weren all thott. / Unde och worth gereth, Ewer Ffurstlichen Genoden hetthe der slack gerurth unde kundeth nicht reden. Des war ich fast gar herthlich betrubt, unde do ich am ostertage Ewer Ffurstlichen Genoden bryfe entfinck, warth ich herczlich froe. / Der almechtige Gott behuth Ewer Ffurstlichen Genoden vor eynnn szulchenns.

Genediger Herre, ich bedancke mich kegen Ewer Ffurstlichen Genoden alsze meynen groszgunstigen unde genedigen herrennn der eren unde fruntschafft, dy Ewer Ffurstlichen Genoden meyner hauszfrowennn erczegeth hott, unde vor dy gyfften unde gobennn. / Unde bedancke mich och fruntlich, Ewer Ffurstlichen Genoden mich begobeth hott inszunderheytt myth dem stucken golles, das ich sulchens kegen Ewer Ffurstlichen Genoden nicht vorschuldeth habe. /

Genediger Herre, hy szeynnn nu fusste reynsche weyne genuck gekomen: / basterth, / romnÿe / unde polgÿtth weys unde roth, / aber ken allekanth. / Wyll Ewer Ffurstlichen Genoden eyn stucken von IIII amen reyns weyn hobennn / adder polgith, wyrth myr Ewer Ffurstlichen Genoden woll zcu wysszen thun wardennn.

Genediger Herre, nowe zceytungen wes ich Ewer Ffurstlichen Genoden nicht zcu schreybennn, dan das off unszer reyde vor der munde in dysszem nordenwynden eyn Hollander ...or II ancker hott eynen Bremer kravell off szeyn schyff getryben, beyde in foller lost geladen, / in dy grunt vorgangen unde von dem kravele ist kener geborgenes.

Genediger Herre, meyne hauszfrowe hot Ewer Ffurstlichen Genoden gekofft III bauchen futher sten = V mark VII groschen gros.

Nach gekofft vor Ewer Ffurstlichen Genoden = LII elen minus I quartyr lowent, / zcu Ewer Ffurstlichen Genoden hemden dorausz gesnitten VIII, / dy wyll szy myth den ersten Ewer Ffurstlichen Genoden zcuschÿcken.

Dy ele vor = IIII groschen, ist = X mark VII groschen.

Nach vor dy goltborden zcu machen, hat szy gegeben = XX groschen

Item vor dy szeyde = VII groschen

Item szo hot szy ires golles dorzcu gethan = III quartyr, macheth = I mark III groschen, unde dys golt widder Ewer Ffurstlichen Genoden geschickt, wolde dozcu nicht dynnennn.

Genediger Herre, meyne hauszfrowe / leth Ewer Ffurstlichen Genoden samth all der fruntschafft fruntlichen grusszennn. Der almechtige, ebige Gott vorley Ewer Ffurstlichen Genoden eynen gluckszeligen geszunden zcogk unde eyn langes lebennn, / uns allen zcum trosste. Domÿtthe ich Ewer Ffurstlichen Genoden dem hogesten thu befhelen, der ffriste unde erhalte Ewer Ffurstlichennn Genoden zcu langen tagen.

Datum Danczke, am 6 tage Maii anno 1538.

Ewer Furstlichen Genoden guthwylliger dyner Macz Platen