AAWO, AB, D.97, f. 132v

Denn hochwirdigen inn Gott Furstenn und Herrnn, / herrn Johanni zu Ermelant / und herrn Tidemanne zu Culmen bishoven etc., unsern gnedigen herrnn samptlich unnd besunderlich

AAWO, AB, D.97, f. 132r

Hochwirdige inn Gott Furstenn, Gennedige Herrnn. /

Unsere willige und angenehme dienste / seint E(wer) H(ochwirdigste) G(nade)n zu ider zceit bevorahnn entpholenn. /

Genedige Herrnn. /

E(wer) H(ochwirdigste) G(nade)n brieff am jungstenn durch dieselbigen ann den hochwirdigen inn Gott herrn herrn Andream bishof zcu Leszlaw etc. geshribenn / und an uns ferner zcu uberreichenn gelangett / haben wir vorruckter tage entphangen / und itztgedochtem herrn bishove / daszmoll inn der Oliva seinde / behendenn lossenn, / was redenn sich aber derwegen nochmols auffm Stoltzenberge zcwuishen seiner h(ochwirdigste) g(nade)n und unsers raths vorordenten zcugetragen / solchs hott E(wer) H(ochwirdigste) G(nade) vonn Heilsperg / aus unsern shrifften / ane zcweifel woll vorlesenn. / Nhu haben wir auff solch E(wer) H(ochwirdigste) G(nade)n beidts / wie auch des herrn pommerellishen woywoden samptlich shreiben beÿ ligendes shrifftlich andtwurt gestern vor dato bekommen / welchs dan (wo wir nicht doru(m)mb sunderliche anregunge / erstlich muntlich / und darnoch ouch shrifftlich gethan) wie wir aus seiner g(nade)n an uns gethanem shreibenn vormerckenn / villeichte underlossenn unnd vorblibenn were. / Welchen brief wir E(wer) H(ochwirdigste) G(nade)n hieneben dinstlich zun handenn stellenn. /

Davon wir / wo es E(wer) H(ochwirdigste) G(nade)n also gelegenn / eine abeshrifft / woll und gerne habenn muchtenn / und thuen uns hirmit E(wer) H(ochwirdigste) G(nade)n befhelenn / die Gott lange inn gutter gesuntheit unnd glucklicher wollfarth enthalten welle. /

Dat(um) Danntzigk, den XXII Octobris anno etc. XLVI.

E(wer) H(ochwirdigste) G(nade)n dinstwillige burgermeister und rathmanne der stadt Danntzigk