GStA PK, HBA, C 1a, K. 497, p. 2unnumbered

Venerabilibus Dominis praelatis, canonicis et capitulo ecclesiae nostrae Varmiensis, fratribus sincere nobis dilectis

GStA PK, HBA, C 1a, K. 497, p. 1unnumbered

Ioannes, Dei gratia episcopus Varmiensis

Venerabiles Domini, fratres sincere dilecti.

Scripsit nobis XXVII Iunii proximi nepos noster Gasparus Hannaw ex Urbe se in negotio Fraternitatum Vestrarum centum ducatos, quos nostro iussu a dominis Fuggaris accepit, impendisse. Quod quidem negotium, cum nobis cum Fraternitatibus Vestris commune esse existimemus, mediam illius expensae partem in nos recipimus, reliquam persolvi Fraternitates Vestrae curabunt. Item et triginta ducatos, quos domino Andreae Grab Fraternitates Vestrae mittere destinarunt. Cumque pro suis cursibus et recursibus non paucisque laboribus nepos noster gratitudinem quandam mereatur, consentaneum esse putamus, ut illi Fraternitates Vestrae XX ducatos designent, nos etiamnum illi non deerimus.

Sicque a Fraternitatibus Vestris centum integros ducatos, quemvis pro XLVII grossis nostris aestimatum (eiusmodi enim monetam et non aurum domini Fuggari exigunt), exspectamus, quemadmodum a venerabili fratre nostro, domino Achacio a Trencka, canonico ecclesiae nostrae Varmiensis, administratore Allensteinensi, Fraternitates Vestrae latius intelligent.

Quas feliciter valere optamus.

Ex arce nostra Heylsberg, paenultima Augusti MDXLI.