Dem durchlauchten, hochgebornen fursten und herren, hern Albrechten, von Gots gnaden marggraff zu Brandenburg, / in Preussen, / zu Stetin, / Pomern, / der Cassuben / und Wenden hertzog, burggraff zu Normbergk und furst zu Rugen, / unserm hochgunstigen, lieben hern und freunde

Durchlauchter, hochgeborner furst, hochgunstiger, lieber her und freundt. / Unsere freuntliche und vleiswillige dinste zuvoran. /

Aus Ewer Furstlichen Durchlaucht schreiben hab wir gestrigs tags / was den mulbaw / und des edlenn, ernfesten hern Friederichen von der Olsnitz, Ewer Furstlichen Durchlaucht obermarschalhs, erbieten / betrifft, / vornommen. / Wollen uns derhalben abermals mit unserm wirdigen capittel bereden / und so vil, als ymmer kan muglich und leidlich sein, Ewer Furstlichen Durchlaucht wilfaren / etc.

Was den ersamen Ewer Furstlichen Durchlaucht underthan Bartholme Vogt angehet, / ist uns nicht zu widder, / das er besehe, ab er mit den parten muge uberein kommen, / dorinnen wir in nicht wollen irren, / unser obirkeit und sententz unschedlich. / Und dieweil wir anmercken, / wie vleissig Ewer Furstliche Durchlaucht vor in schreibt, / im auch die gnad gethan, / das er aus dem rathe ge[kom]men, / mag er unvorhindert in unser stad ...lh seine sache furdern, / und sunlich mit denn ...ten sich vortragen. / Es wolde im aber Ewer Furstliche Durchlaucht gebieten, / das er seinen mundt / messige, / hönlich und spitzig widder nÿemants etwas vornehme. / Der lieb wil sein, / mus sich lieblich halttenn / etc.

Vor die zeitungen, die uns Ewer Furstliche Durchlaucht zugeschickt, thu wir uffs hochste dacken, / und so den weg nach Regensburg Ewer Furstliche Durchlaucht imants wurd fertigen, / und etwas, das zu Ewer Furstlichen Durchlaucht sache tuglich mocht sein, / von uns dohin geschrieben wolt haben, / dorzu erbieten wir uns willig, / dan Ewer Furstliche Durchlaucht und dem churfurstlichen hause Brandenburg, / wie wir negst gemelt, / freuntlich und nutzlich zudienen, / sein wir erbottig und gevlissen, / Got den almechtigen bittende, / dieselbte Ewer Furstliche Durchlaucht zu langen zeiten in guter gesuntheit und aller wolfart zuenthalten. /

Datum Braunsberg, den III Iunii M D XLI.

Ioannes, von Gots gnaden bischoff zu Ermelanndt

manu propria subscripsit