Dem Durchlauchtigen Hochgebornenn Furstenn unnd Herren, hern Albrechtenn, von Gotts gnaden marggraffen zu Brandenburg, in Preussen, zw Stettinn, Pomernn, der Cassubenn und Wenden hertzog, / burggrafen zu Nurnberg und furst zw Rugenn, unserm hochgunstigen lieben herren unnd freunde /

Durchlauchter Hochgeborner Furst, hochgunstiger lieber herr unnd freundt. / Unnsere freuntliche unnd vleiswillige diennste zuvorn. /

Unns ist hie Eurer Furstlichen Durchlaucht schreibenn / datirt den XV dits aus Konigsbergk, / der mordtbrenner halbenn / wordenn, / darann wir unns etwann entsetzt mit vil bedenckenn, / vonn weme das muge herkomen / das solche vergessene leuthe werdenn angericht / die shadenn zu thun / inn dem vornhemenn / davon sie keinenn nutz erlangen, / unnd bedanckenn uns fast freuntlich / genn Euer Furstliche Durchlaucht das unns die vonn wegenn solcherr leuthe kentliche antzeigung hott mitgeteÿlet, / worauf wir allenn unnserenn amptleuthenn vonn hinnenn shrifftlich befolhen / ihren muglichsten vleis unnd gutte achtung zu habenn, / so inndert solche bezeichnete leuthe inn unserm lande befunden, / das die / bis auf weittern unsern besheidt / angehaltenn wordenn. /

Weil auch diesser Eurer Furstlichen Durchlaucht lauffender bothe mit gemeltem shreibenn unns ist zukomenn, / ubershicke wir hiebeÿ unnser antwurt / auf Eurer Furstlichen Durchlaucht brief / inn Jacob Stollen aus unser jurisdicionn, / eines vorlaufnen priesters sache, / welchs inn unserm austzuge negst von Heilsberg in unnser cantzeleÿ ungefordert verbliebenn. / Wir begeben unns diessen [ta]g vonn hinnenn gen Mariennburg in koniglicher handlung / [un]ns auferlegt, / davon wir kurtz zuvor Eurer Furstlichen Durchlaucht geshrieben, / [de]r freuntlichen gunst wir unns befelhenn / unnd derselbten alle seligheit und wolfart von Gote dem almechtigen wunshen. /

Datum Elbing, den XX Iulii MDXLIIII. /

Ioannes von Gots gnaden bisschoff zw Ermelandt