Demm durchlauchtnn hochgebornenn furstenn und hern / hern Olbrechtnn h[erczo]gen in Preussenn margraff zcu Brandenburg ...ttum Semenn etc. ... ... meynn ... libenn hern.

Durchlauchter, hochgeborner furst, gnediger, liberr herrr. Meinn willige dienst zuvorann etc. /

So mir Got der almechtig noch VIII iornn vnd V montnn widerummb heim hot geholffenn / vnd zcwischenn mir / vnd meynemm libnn brudernn hernn Nibschicz vil ist geredt, / ouch gehandelt wordenn, / das Ewren furstlichen Gnaden zu ehrenn und zu vil guttennn mocht gereichenn, / hab ich nicht mocht nochlossenn, der selbigen Ewer Gnaden mit dissemm botenn zu schreibenn / in hoffnung, dis meinn schreibenn, / so ich noch zu Ewern Gnaden mich nicht vorfuegenn mag, / guttlich von mir werd uffnhemenn etc. Ich vorsthe, das die ocht des reichs Ewer Gnaden fast zu herczenn geth vnd besverlich ist etc. So wold ich wol, das ich derhalbenn einn stundlein bey Eweren Gnaden mocht seinn. / Vorhoffet mich solchs besvernis vil zu geryngerenn, / dann ich bin disse zceit herr darummb und darbey gewest, / ouch mit den ummbgangenn, die das treibenn. / Befind nicht, das sich Ewer Gnaden oder das konigreich Polnn derhalbnn fast habenn zu bekommerenn, / und ist so wichtig nicht, wie man sich bedunckenn lest. / Hirummb, so bitt ich Ewer Gnaden, wold derhalbnn einn frey und fridlich gemuet habenn. / Hoth Ewer Gnaden uff das mol im reich nichts mocht ausrichtenn besiczende die land Preussenn, / was sol Ewer Gnaden svache widerpartey ausrichtenn, / die in Preussenn nichts hoth, / do vonn wir, ab Got wil, / im korczenn weiter wollenn redenn. Dis schreibenn hab ich allein darummb gethann, / das sich in mittler zceit Ewer Gnaden zu fried gebe, der ich mich thu befhelenn. Got er almechtig geb derselbigen Ewer Gnaden in glugseligen zunemenn langwerige gesuntheit. /

Datum Krako, denn 16 tag Augusti anno Domini M D XXXII.

Eweren furstlichen Gnaden williger Ioannes, bischoff zu Culmenn manu propria.