GStA PK, HBA, C1, No 558 2 unnumbered

Dem durchlauchten, hochgebornen fursten und hern, hern Albrechten, von Gots gnaden marggraff zu Brandenburg, / in Prewssen, zcu Stetin, Pomern, der Cassuben und Wenden(n) hertzog, / burggraff zu Nurmberg und furst zu Rugen(n), / unserm hochgunstigen, lyben hern und freundt

GStA PK, HBA, C1, No 558 1 unnumbered

Durchlauchter, hochgeborner furst, hochgunstiger, lyber herr und freundt. / Unser freuntliche, wÿllige dinst zuvoran. /

Uns hat der edel ernfester herr Nicklas Dtzÿalinsÿ, colmischer castellan und hawptman zcu Strassburg, geschryben, / wÿ E(wer) F(urstliche) D(urchlauch)t seynnen shon, pringer ditz, etlich jhar lang beÿ sich erhalthenn, / und ihn bysher in guthen thugendenn ertzogen, / des er fast gen E(wer) F(urstliche) D(urchlauch)t danckpar ihn, seÿnnen shon, / E(wer) F(urstlichen) D(urchlauch)t zu dancken derwegenn, dÿsmhal thut schickenn(n), / worinne wÿr auch nicht kleÿnnen wolgefhallen thragenn(n), / derhalben auch nebenn(n) dem hernn(n) castellan E(wer) F(urstliche) D(urchlauch)t dancken, / bÿttende, / seynnem shon vordan ein genediger her zcu sein, / das wir umb E(wer) F(urstliche) D(urchlauch)t, der gunst wir uns befelhen, freuntlich zuvordynen stets wollen schuldig sein. /

Datum(m) Heÿlsberg, XXIIII Marcii M D XXXIXt(en).

Ioannes, von Gots gnaden byschoff zu Ermelandt