Dem durchlauchten, hochgebornen fursten unnd herren, hern ⌊Albrechten⌋, von Gots gnaden marggraff zu ⌊Brandenburg⌋ / in ⌊Preussen⌋, / zu ⌊Stetin⌋, ⌊Pomern⌋, der ⌊Cassuben⌋ und ⌊Wenden⌋ hertzog, / burggraff zu ⌊Normberg⌋ und furst zu ⌊Rugen⌋, / unserm hochgunstigen, lieben herren und freunde
Durchlauchter, hochgeborner furst, hochgunstiger, lieber her und freundt. / Unsere freuntliche und vleis willige dienste zuvoran. /
Es ist an uns gestrigs tags gelanget / der edell, ernvhest her ⌊Alexander Starosziebski⌋, unsers vilgeliebten freundts, des hern ⌊woiwoden zu Plotzke und heubtman uff Marienburg⌋, ⌊schwester⌋ sohn, / der diese tage neulich aus ⌊Italien⌋ gekommen / und etliche gescheffte bei Ewer Furstlichen Durchlaucht von wegen seins ohemen, des hern woiwoden, / auszurichten hat, / den wir an diese unser vorschrifft und commendacion nicht haben mugen von uns lassen, / freuntlichs vleis bittende, in gnediglich anzunehmen / und zu horen, / auch in mit gnediger abfertigung in dem, was gemelter unser vielgeliebter freundt, der her woiwod, von Ewer Furstlichen Durchlaucht durch in thut begeren und bitten, / an uns lassen kommen, / welchs wir umb Ewer Furstliche Durchlaucht mit vielen freuntlichen und angenehmen diensten zubeschulden uns vorpflicht erbiethen.
Es ist auch her ⌊Alexander⌋ negst zu ⌊Wien⌋ gewesen, / do der her ⌊Stanislaus Matzyeiowski⌋ seine botschafft Ewer Furstliche Durchlaucht betreffende ⌊romischer koniglicher / maiestet⌋ / hat angetragenn / und das antwort doruff / neben der abschrifft des brieffes von romischer koniglicher an kayserliche maiestet mit sich genommen / und ⌊koniglicher maiestet⌋, unserm allergnedigisten hern, zugebracht, / wie dan Ewer Furstliche Durchlaucht von im wirt weitleufftiger haben zuvornehmen, / das er Ewer Furstlichen Durchlaucht wie ein gelerter, wolgeschickter jung man guten bericht wirt thun, / freuntlich bittende in in sondern gnaden, / und uns in angefangener freuntlicheit befolhen zuhaben.
Datum ⌊Heilsberg⌋, XV Iunii M D XLI. /
⌊Ioannes⌋, von Gots gnaden bischoff zu ⌊Ermelandt⌋ /
⌊Ioannes⌋ episcopu[s] Varmiensis manu propria subscripsit
Postscript:
Unser heubtman von ⌊Seheburg⌋ und lieber schwager der edell, ernfest ⌊Hans Glaubitz⌋ hat uns hie des erbarn ⌊Hansen Pusch⌋, Ewer Furstlichen Durchlaucht heuptmann uff ⌊Orttelsburg⌋, schreiben gewiesen, / dorinnen er sich understehet, / das kein heuptman vor im gethan, / unser beuer und beuten aus dem unserm zuvorbieten, / aus den orten, / do sie und ire veter bei menschen gedencken / und zuvor / in zeiten unserer vorfarn alwegen fridlich gebauet und gearbeit, / mit dreuen, / das er solchs von Ewer Furstlichen Durchlaucht befelh habe, / welchs uns nicht wol gleublich, / so er die doselbst befunde, / sie wolde gebunden gen ⌊Konigsberg⌋ schicken, / welchs guther nachbarschafft nicht wol anstunde. / Wurde uns auch leidt sein, / das unser arme leut gebunden aus dem unsern solten gefurt werden. / Ist hierumb unser freuntlich bitt, Ewer Furstliche Durchlaucht wolte ⌊im⌋ solchen frevelh nicht gestatten, / der andern unlust mocht brengen, / sondern gedachte unsere beuer / uff dem, / do sie so lange gearbeit / bis zu besichtigung, / so die von Ewer Furstlichen Durchlaucht notig geacht, / lassen bleiben, / welchs wir freuntlich und nachparlich umb Ewer Furstliche Durchlaucht gerne wollen vordienen, hyeruff bittende ein gunstig antwort.
