GStA PK, HBA, C1 No 897, 2 unnumbered

Dem durchlauchtigen, hochgebornen fursten und herren, hern Albrechten, von Gots gnaden marggraff(en) zu Brandenburg, / in Preussen, / zu Stetin, / Pommern, der Cassuben und Wenden hertzogen, burggraff(en) zu Normberg / und fursten zu Rugen, / unserm hochgunstigen, lieben herren und freunde /

GStA PK, HBA, C1 No 897, 1 unnumbered

Durchlauchter, hochgeborner furst, hochgunstiger lieber her und freundt. / Unsere freuntliche und vleiswillige dinste zuvoran. /

Euer F(urstlichen) D(urchlauch)t schreibens an uns / und gleichs lauts an den hochwirdigen hern bischof von Colmsehe, / wie sein liebd uns angezeigt, / ausgangen, / belangende den von Strasburg / haben wir hievor ein abschrift / neben unserm brieff, / wie wir E(wer) F(urstlichen) D(urchlauch)t unlang geschrieben, / an in geschickt, / woruf uns kurtzvorgangner tage von im antwort zukommen, / wie auch gleicher weise dem gedachten herren colmischen bischoffe, / der E(wer) F(urstliche) D(urchlauch)t durch schriften solch antwort hat wissen lassen, / welche eins inhalts ist mit der, die an uns gestelt, / derwegen wir uberflussig sein achten, / die hie zuwiderholen, / sondern bittenn freuntlich, E(wer) F(urstliche) D(urchlauch)t wolte diese sach bis auff die zeit, / das E(wer) F(urstliche) D(urchlauch)t und wir gluckselig zu Crokaw zusammen kommen, / bei dem auch, wie der her von Colmsehe gebeten, / beruhen lassen. / Was wir alsdan aldo zu fried und hinlegung derselbenn werden zuthun vormogen, / sal an unserm vleiss kein mangel befunden werden, / dan E(wer) F(urstlichen) D(urchlauch)t freuntlich zudienen und wilfaren sein wir willig und erbottig, / der gunst wir uns freuntlich bevelhen. /

Dat(um) Heilsperg, den vierden Aprilis 1543.

Ioannes, von Gottes gnaden bischoff zu Ermlandt /