Dem durchlauchtigen, hochgebornen fursten und herren, hern Albrechten, von Gottes gnaden marggraffen zu Brandenburg, / in Preussen, / zu Stetin, / Pommern, / der Cassubenn und Wenden hertzogen, / burggraffen zu Normberg und fursten zu Rugen, / unserm hochgunstigen, lieben herren und freunde /

Durchlauchter, hochgeborner furst, hochgunstiger, lieber her und freundt. / Unsere freuntliche und vleiswillige dienste zuvoran. /

Wie uns Ewer Furstliche Durchlaucht schreibt / von uns begerende zuwissen, / zu welcher zeit wir bei unser kirchen zur Frauenburg sein werden, / domit Ewer Furstliche Durchlaucht uns und unser wirdig capittell deste gewisser in sachen, die ir land und leut betreffen, / hett zubeschicken. / Woruff wir Ewer Furstlichen Durchlaucht freuntlicher weis nicht wollen bergen, / das wir den mitwoch zukunftig zu Braunsberg mit gotlicher hulff einzukommen uns haben vorgenommen, / und bei unser kirchen zur Frauenburg zur fru zeit den donnerstag dornach / mit wenig seumen sein werden, / fordan unserm weg weiter nachzusetzen. / Wirt uns do jmants von Ewer Furstlichen Durchlaucht wegen ansprechen, / den wolle wir gerne sehen und horen / und in dem, / wie wir alweg gespurt, / gen Ewer Furstliche Durchlaucht, was die von uns wirt fordern, / so vil uns muglich, wilferig halten, / die wir hiemit gotlichen gnaden / und uns derselbten gunst freuntlich bevelhen. /

Datum Heilsperg, den V Aprilis 1543.

Ioannes, von Gottes gnaden bischoff zu Ermlandt /

qui supra manu propria subscripsit