GStAPK, HBA, C1, No. 1108, f. 2unnumbered

Dem durchlauchtenn hochgebornnen furstenn und herren hern Albrechten von Gotts gnadenn marggraffen zu Brandenburg / inn Preussenn / zu Stetin / Pomernn / der Cassuben und Wenden hertzog / burggraff zu Nurmberg unnd furst zu Rügenn / unnserm hochgunstigen lieben herrn und freunde

GStAPK, HBA, C1, No. 1108, f. 1unnumbered

Durchlauchter hochgeborner furst / hochgunnstiger lieber herr und freundt. / Unnsere freuntliche unnd vleiswillige diennste zuvorann. /

Es hat uns gegenwertiger zceiger Hanns Glasnowski / der unns / wie wir im löbischen bischtumb gewesenn unnd dasselbe gehaltenn / durch seinen vather inn unnserenn schutz zunemen bevolhenn wordenn / ersucht / unnd dieweil er etzliche gescheffte / wegenn eines gutts Glasnow / under E(uer) F(urstlichen) D(urchlauch)t im osterrodischen gelegen / das sein vater ihm inn seinenn unmundigenn jharen vorkaufft / davor das gelt bisher noch nicht aller gefallenn ist / bey E(uer) F(urstlichen) D(urchlauch)t auszurichtenn hatt / unns dienstlichs vleisses / ihnn bey derselben durch unnsere vorschrifft zufurderen / angefallen / damit er widerumb zu gedachtem gutte komenn / und das betzalete gelt erlegenn möchte / wiewoll wir nu gar nichts zweiffelen / E(uer) F(urstliche) D(urchlauch)t menniglich zur billickeit zuvorhelffenn geneigt unnd gewogenn / habenn wir dannoch ihm sein vleissigs bittenn / nicht wegerenn wollenn / unnd ist demnach ann E(uer) F(urstliche) D(urchlauch)t unnser freuntlichs bittenn / dieselbe wolle bemeltenn Hans Glasnowski inn gnedigem bevelh habenn / unnd ihm wor zu er recht hatt / auff das er widderumb zu dem / das ihm inn seinenn unmundigenn ist abhendig wordenn komen muge / vorhelffenn / das seinn wir hinwider idere tzeit freuntlich zubeschuldenn gewogenn / unnd thun hiemit E(uer) F(urstliche) D(urchlauch)t / die wir vleissig bittenn / unns inn alter und gewönlicher gunst zuerhaltenn / inn langweriger gesuntheit / und gluckselyger regirung Gott dem almechtigenn bevelhenn. /

Dat(um) Heilsberg, den vierdenn Decembris M D XLVII.

Ioannes vonn Gottes genadenn bischoff zcw Ermlanndt qui sup(ra) ma(n)u p(ro)pria s(ubscrip)s(i)t