BCz, 403, p. 632

Dem Erwirdigenn in Gott, unnserm besondernn liebenn freunth, hernn Johansenn bieschoffenn zu Colmensehe

BCz, 403, p. 631

Unnser freuntlich diennst zuvorn.

Erwirdiger in Got besunder lieber freundt. /

Wir thune E(uer) L(ieb) bei gegenwertigem zaiger einn elenndt, so gut der Almechtige Got unns denselbenn auf diessmall in der jagt / gegebenn unnd wir uberkomen haben, / uberschicken. / Mit gnedigem unnd freuntlichem begernn, / E(uer) L(ieb) wölle dasselb wil<lt>pret, wie gering es auch sei, zu freuntlichem danck vonn unns annemen unnd auf den zukunfftigenn vhassnacht mit ewren guthen freunden inn froligkeith und ergetzligkeit vortzheren / und dobei unnsern guthenn willenn vormergkenn. / Das geraicht unns von euch zu gnedigem gefallenn. /

Dat(um) Konigkspergk, denn 14 tag Februarii anno 1536.

Vonn Gotts gnadenn Albrecht marggraff zu Brandenburgk, in Preusen, zu Stettin, Pomern, der Caschuben unnd Wenden hertzogk, burggraff zu Nurenbergk und furst zu Rugenn