Dem Erwirdigenn in Goth, / unsernn lieben Freund und Nachtbarnn, herrenn Johansen bischoffenn zw Ermelanth

Unser freuntschafft und alles guts zuvorn.

Erwirdiger in Goth, / besunnder lieber Freund und Nachtbar.

Wir konnen Euer Lieb freuntlicher meÿnung nicht bergen, / das an unns durch ein gemein geruchtt aus der Masaw gelangtt. / Wie alte konigliche maiestaten zu Polan etc. unser gnediger her und freuntlicher lieber oheim in harter krankheitt sein und ligenn solle. / Und wiewol wir zu Goth verhoffenn, / auch unser gröste und höchste bith ist, / das an dem nichts sei, / so wirdt doch sölch gerucht umb so viel desstartlicher gemerett, / das von Preslaw in diese landt arth geschriebenn, / als sölte hochgedachte konigliche maiesteten zu Nepolo[m]itz irenn lecztenn tagk beschlossenn haben. / Und ob wir schoenn solchem noch vielweniger glaubenn gebenn koennen, / dringt und zwingt uns dannocht / das getreue hertz. / Das wir auss schuldigenn pflichtenn / geschwiegen genaden und bluttverwandter freuntschaft. / Welchs uns one das neben diesem, / unsers genedigen liebenn herren und konigs / wolfarth und gesuntheitt / uns zuerfreuen und herwiderumb des jegenspils / am herterstenn zubeschwerennn und zubekommernn / diesenn unsernn eigenenn diener anden erenvhesten unsern rathe und lieben getreuen Nickel Nipschitzen von Bartzsch etc. abzufertigenn verursacht. /

Domitt wir grund und warheitt, / seiner koniglichen maiestaten zustants, / gesuntheitt und wolfarth erfarenn mochtenn. / Und zveifelnn gar nicht, / woe was an diesem were / Euer Lieb als ein ansehenlich glied der löblichenn Cronn zu Polann ... wurdt auch davon wissenschafft gebenn. / Und wan nun Euer Lieb in diesem oder andernn auch etwas nach Craka[u] zuschreibenn bedachtt, / sölle solchs bemelter unser diener mitzunemen unbeschwertt sein. / Dan Euer Lieb in einem viel mererem freuntliche wolthettige nachparschafft zuerzaigenn, / seind wir ider zeitt gannz geneigt. Mit angeheffter bith / so Euer Lieb vonn hochberurter koniglicher maiestaten zu Polann etc. solcher gelegennheitt ichter erfarenn / Euer Lieb wöllenn uns dasselbig nicht verhaltenn, / sönder freuntlichenn eröfnenn. / Das verdienen wir umb Euer Lieb hinwider freuntlich. /

Datum ebendo Konigsperk, denn 21 tag Octobris 1538.

Von Gots genaden Albrecht marggraf zu Brandenburck, in Preussen etc. hertzog etc. manu propria subscripsit