Reverendo in Christo Patri, domino Ioanni episcopo Culmensi et nostro apud caesaream et catholicam maiestatem consiliario ac oratori, sincere nobis dilecto

Sigismundus Dei gratia rex Poloniae, magnus dux Lithuaniae, Russiae, Prussiae, Masoviae etc. dominus et heres.

Reverende in Christo Pater sincere nobis dilecte.

Tametsi dubitabamus, ne non prius istinc discedat Vestra Paternitas, quam praesentes nostrae illi afferantur, in omnem tamen eventum scribi facere maluimus haec, quae ad cognitionem Strenuitatis Tuae necessario nobis pertinere videbantur, ut si forte cubicularius noster adventu istuc suo discessum eius praeveniat, earum rerum, quas ad caesaream et Romanorum maiestatem scribimus, ignara esse non reperiatur. Quibus quidem in primis scribimus id, quod ad negotium concordiae inter serenissimum dominum Romanorum regem et adversarium eius persuadendae reliquum adhuc in spe esse advertimus, deinde de banno adversum illustrem dominum Prussiae ducem, nepotem nostrum, ex [i]udicio imperialis camerae nuper promulgato, sicut haec ex litterarum ad illos nostrarum exemplis, quae Tuae Strenuitati cum praesentibus mittimus, plane cognoscet. Quare hortamur illam, ut de banno revocando diligenter cum caesarea maiestate nomine nostro agat et percunctetur modis aliquibus, an ex animo et serio caesarea et Romanorum maiestas conventum de concordia instituere pacemque cum adversario inire [v]elit nobisque sententiam et voluntatem illorum perscribat. Nam rex Io[ann]es nulla ratione adduci poterit ad mittendos in Germaniam suos de pace oratores, nisi prius certior fiat, rem secum serio agi debere et publicae fidei litteras oratoribus suis sufficienter scriptas ab utraque ista maiestate habeat, quos Tua Strenuitas per hunc cubicularium ad nos mittere curabit. Nos autem, nisi bannum revoc[a]retur, cogeremur edicto nostro prohibere, ne cum exteris commercia in regno nostro haberentur, quae res gravem utrimque externis et domesticis nostris afferre possit incommoditatem. De nobili Cornelio Scepero loco suo istic ad negotia constituendo, Strenuitas Tua ita faciet quemadmodum illi pr[i]oribus litteris nostris commiseramus, nam in nostris neminem in promptu habemus, quem ad hoc munus delegare commode possemus.

Bene valeat Tua Strenuitas .

Datae Cracoviae, die XV-a Iu[n]ii anno Domini M-o D-o XXXII-o, regni nostri anno vigesimo sexto.

Sigismundus rex subscripsit