So mir Got der almechtig widerummb mit gesuntheit hot zu ⌊koniglicher majestet vonn Polenn⌋ meynemm allergnedigsten herrenn geholffenn
/ hab ich nicht vorgessenn was Ewer furstlichen Gnaden mit mir / den tag do Ewer Gnaden vonn ⌊Regensburg⌋ abczog / gehandelt / und gedochterr koniglicher majestet anzutragenn befholenn / welchs ich mit allemm fleis gerne gethon und gebeten so der zcug der iczt vorhandenn / do Got ver sey / einn vorgang gewunne so vil koniglicher majestet meynnem allergnedigsten heren muglich / sich wold bearbeitenn / do mit Ewer Gnaden ⌊landenn⌋ kein scheid geschege / und das bey denn / die das zcugs gewaltig / zu wegenn brengenn. / Do nebenn hab ich ouch angeczeigt Ewer Gnaden fruntlichenn gunstigenn willennn an gedochte ⌊konigliche majestet⌋ / und das erbittenn ann ir majestet gethann. / Aus welchemm ⌊ir majestet⌋ grossenn wolgefallenn gehabt / und mit gleichemm erbittenn Ewer Gnaden fast hot lossenn danckenn / zu antwurt gebennn. / So vil ⌊ir majestet⌋ vmmer muglich / wolde Ewer Gnaden bogerenn mit guttemm willenn gerne nochkommenn. / So ⌊ir majestet⌋ bey dem teil was mochte erhebenn / es wer durch brive oder botschafft / und wor ouch sunst ir majestet Ewer Gnaden viel lieb und fruntschafft mocht erczegenn / erbeut ich alzeit geneigt vmm willen. / Dis hab ich so uff Ewer Gnaden befelh mir gethann der selbtenn Ewer Gnaden nicht wold vorhaltenn.
Wir habenn hie uff disse zceit nicht sunderlichs newes / allein / das der Turk ⌊koniglicher majestet⌋ vnnd ⌊romischer koniglicher majestet⌋ [b]otschaffter hab abgefertig anczeigend / so sie nicht habenn wolt fried habenn. / In wold kriege genug gebenn / und hab die botschafter lossennn vmmbfurenn das sie al seinn volk und gewalt an buxsenn und szeterenn / habenn mussennn sehenn / und so wol begebt hab lossen / von sich zeyhenn. / Sunst hor wir nichts sunderlich... das der Turk fast mit seynemm zcoge eyl.... Ich besorge mich / das her sich do wirt vorh... do loblicher gedechtnis ⌊koning Luduig⌋ ist vn...menn nicht weit do vonn sagt man / das ein f... stelle mit gebruchenn und wassernn sey do ...sicher leger seinn mag. / Und wirt vylle... uns wellech mit der harre mued machen. Was weiter daraus wil werden / wirt ... zceit in korczenn tagenn mit brengen etc.
Anders weis ich uff dis mal Ewer furstlichen Gnaden nicht zus[chrei]bennn / alleinn das ich mich der selbigen Ewer Gnaden mit allemm fleis befelenn / mit erbittenn / w... Ewer Gnaden werd vmmer mugen vil liebs und d... thun / das ichs nummer wil nochlossenn. /
