Unsern fruntlichn grues, / mit alles guttn entpittung zuvoran. Ersame, nhamhafftige hern, bsundere gutte freunde.

Wir habn in ankumfft unser liben svesterr Ewer Erbarkeit schreiben erhalten, worinne uns wirt angeczeigt, was ir vonn wegen gehabter mhu und arbeit ires seligen ehegaten in Ewer Erbarkeit sachen geschenckt und zu komenn. / So bedunckt uns, das ein selczem gobe der VI hungerischen gulden, welche in nacht und bir sachen iren tochter man suld vorwurkt habenn, / dar innen wir vil anders bericht, / ouch wie solche trunkenheit geschen unnd bey leben irs ehegaten nochgegebenn, erst noch seinem todlichem abgange wunderlicher weis gefurdert, sold Ewer Erbarkeit, / wie wirs do vor halten, nicht sein vorborgenn. / Und dieweil sie uns ouch bericht, das etwan IIII engelotten gedochtem irem manne vor eine andre sache, / die brucken nicht belangenn, soltnn vor ehret sein, / die, welche ouch ir in die rechenschafft gelegt, / hab wir Ewer Erbarkeit mit dissem unsermm antwurt zu ersuchen nicht mocht nochlossen. Derselbten vil fruntlichen willen zu erweisen geneigt und, Gote dem almechtigen in sein gnad befhelen. /

Datum Lobau, den VIII Marcii M D XXXVI.