AAWO, AB, D. 132, f. 128r

Carolus divina favente clementis electus Romanorum imperator semper augustus ac Germaniae, Hispaniarum utriusque Siciliae, Hierusalem, Hungariae, Dalmatiae, Croatiae etc. rex, archidux Austriae, dux Burgundiae, Brabantiae etc., comes Habspurgi, Flandriae, Tyrolis etc. universis et singulis principibus tam ecclesiasticis quam secularibus, archiepiscopis, episcopis, ducibus, marchonibus, comitibus, baronibus, nobilibus, militibus, capitaneis, praefectis, commissariis, burgimagistris, iudicibus, consulibus, communitatibus civitatum, terrarum et locorum quorumcumque gubernatoribus et offcialibus daciariis, thelonariis, portuum, pontium et passuum custodibus et ceteris quibuslibet nostris et Sacri Romani Imperii subditis et fidelibus dilectis, ad quos praesentes pervenerint gratiam nostram caesaream et omne bonum cum honoribus. Sincere nobis dilectus Ioannes Dantiscus, orator serenissmi regis Poloniae etc., fratris et consanguinei nostri carissimi, in negotiis suis in curia nostra fuerit et ad serenissiama suam <maiestatem> redire statuerit, cupimusque illi, uti par est, per Sacrum Romanum Imperium et alia quaecumque regna et dominia nostra, et ubique locorum et terrarum iter liberum et securum patere. Vos omnes praefatos enixe hortamur, subditis vero nostris disctricte praecipiendo mandamus, quatenus praedictum Ioannem cum famulis, equis, sarcinis, vallisiis et rebus suis omnibus, ubique et per quaecumque loca, tam terrestria, quam aquatica die noctuque ire, stare, transire, morari et redire libere, secure absque omni impedimento et sine cuiuslibet oneris realis et personalis solutione permittatis et ab aliis permitti faciatis, illique, si opus fuerit et quoties requisiti fueritis, de guidis viarum ductoribus atque aliis necessariis pro securitate sua provideatis, facturi in eo nobis rem gratam, subditi vero nostri expressam voluntatem nostram harum testimonio litterarum manu nostra subscriptarum et sigilli nostri secreti a tergo impressione munitarum.

Datae in oppido nostro Vallisoleti die vicessimo nono mensis Februarii anno Domini millesimo quingentesimo vicesimo tertio, regnorum nostrorum Romani quarto, aliorum vero omnium octavo

Carolus

Ad mandatum caesareae et catholicae maiestatis proprium

Hannart subscripsit manu propria