GStAPK, HBA, C1, No. 985, f. 3unnumbered

Dem Durchlauchtenn Hochgebornenn Fursten und Herren, hern Albrechtenn, von Gottes gnaden marggraffen zw Brandenburgk in Preussen, zu Stetin, Pomeren, der Cassuben und Wenden herzogk, burggraf zw Normberg und furst zw Rügen, / unserm hochgunstigen lieben hern unnd freund

GStAPK, HBA, C1, No. 985, f. 1unnumbered

Durchlauchter Hochgebornner Furst, / hochgunstiger lieber herr unnd freunndt. / Unnsere freuntliche unnd vleiswillige dienste zuvorann. /

Wie wir aus negster gehaltner thagfart von Graudentz bisher seinn gelanngt / ist zeiger dits, / einer des adels aus der Cronn ann unns gekomenn, / der unns angetzeigt / das er sich inn diennst zw E(urer) F(urstlichen) D(urchlauch)t zu begebenn hab vorgenhomenn, / vonn unns mit sonndrem vleis bittend / ihnn an E(uer) F(urstliche) D(urchlauch)t zuvorshreibenn / welchs wir ihm auff solchs sein innstendigs anfurdrenn / nicht haben mugen vorsagenn, / unnd ihm dis unnser shreibenn an E(ure) F(urstliche) D(urchlauch)t mitgegebenn. /

Vonn newenn zeittungenn ist auf dissmhal nichts bei unns, / das zuvor E(urer) F(urstlichen) D(urchlauch)t nicht were zugebracht, / nemlich wie tapffer sich E(urer) F(urstlichen) D(urchlauch)t vetter der durchlauchtig hochgebornn furst marggraff Albrecht zw Brandennburg etc. mit seinenn reutternn nebenn hertzogenn Moritzenn vonn Meissenn / unnd dem graffen vonn Furstenbergk / unnd andrenn / wider die Frantzosenn gehaltenn, / die San Desideri, ein starcke stadt in Franckreich vonn kaÿ(serliche)r m(ajeste)t belegert, / habenn wolt mit volck, / profanndt unnd besoldunge entsetzenn, / unnd daruber erlegt wurdenn, / wiewol geshriebenn wirt / das am sturm kaÿ(serlich)e m(ajeste)t ann derselbtenn stadt etwan shadenn ann kriegsleuthenn genhomenn, / so soldt sie dannoch uberhoupt seinn eröbert. /

Es wirt auch gesagt / das der newe deutzshmeister administrator VIII-c reszige / bei kaÿ(serliche)r m(ajeste)t im felde habe, / das es auch den Enngellishenn vor Bologne inn Bertanienn glucklich ergangen / unnd vor Paris mit denn kaÿserishenn sollenn zwsamne komenn. / Wirt unns sonnst vonn koniglich(en) hove, / vonn dannenn wir unnsers botenn alle stundenn seinn gewertig, / zugeshickt, / wollenn solchs E(urer) F(urstlichen) D(urchlauch)t GStAPK, HBA, C1, No. 985, f. 2unnumbered derer gunst wir unns bevelhenn / nicht vorhaltenn, / bittennde / so die dergleichenn etwas uberkueme unns freuntlich mitzuteilenn. /

Datum Wormedith, den XX-n Octobris MDXLIIII. /

Ioannes von Gotts gnadenn bisschoff tzw Ermelanndt / ma(n)u p(ro)pria s(ubscrip)s(i)t