Ioannes Werden. /

Unsern freuntlichen grus und gutwillig erbieten zuvor. / Gestrenger und ernfester herr, / besonder, lieber frendt. /

Wir konnen Ewer Herlichkeit nicht verhalten, das Sercz verschiener tage der heuptman zu Osterrode, ettliche unsers bischtumbs, alt gesessene leuthe, / welche sich lange zeitt alhie enthalten haben, / von uns gleich als die in sein ampt gehoren, / hatt furdern lassen, / darausz wir nu verursacht werden, der gleichen auch zu thuende, / und die jenigen, so sich ausz unserm bischtum begeben, / und ÿtz im furstenthunnn mit heuszlicher wonunge sich enthalten, / widderumb an dissen ort unther ire geburliche hirschaft, dahin sie von rechtswegen gehoren, / zu furdern. / Und wollen Ewer Herlichkeit nu weiter nicht unangezeigt lassen, / das zwien burger zu Salfelt unter Ewer Herlichkeit heuptmanschaft des preuschenmarktischen ampts wonhaftig sein / mit namen Caspar Seitz, ein brewer, / und Francze Schmidt, / welche beide ausz unserm dorff Goltbach diszes lobauschen gebitts entworden, / und uns zugehoren. / Damit uns nü widderumb gleichmessige gerechtigb(!)eit gepflogen werde, / ist unser freuntlich begerr, / Ewer Herlichkeit wolle genante zwien burger zu Salfelt darzu halten, / das sie sich hieher in unser bisthum, / da sie gezogen und geboren, / auf das furderlichste mit heuszlicher wonunge widderumb begeben, / ader unserm burgraffen alhie zur Lobau gewisse zeitt und stelle dieselbigen rechtlich zu furdern, und ferner anzunhemen, / ansetzen. / Das seind wir gen Ewer Herlichkeit im gleichen und grossern fall zu beschulden gutwillig, / die wir hiemit dem almehtigen thun befelhen.

Datum uff unsern schlosz Lobau.

Capitano in Risenburg